💥पुर्णेतील सर्वच राष्ट्रीयकृत बँकांच्या एटीएमवर गाढवांचे अधिराज्य...!

💥आता 'ऑल टाईम मनी' विसरा अन् म्हणा आता ऑल टाईम ओनली 'महाराजाधिराज गाढव' एटीएमचा धनी💥 

पुर्णा (दि.२४ जुलै २०२१) - पुर्णेतील राष्ट्रीयकृत बँकांचा कारभार 'तु कर वटवट मी हाय निबरगट्ट' अश्या प्रकारचा झाला असून बँक अधिकारी व कर्मचाऱ्यांच्रा मनमानी कारभारामुळे बँके खातेदार पेन्शन धारक,विविध शासकीय योजनांतील बेरोजगार कर्ज लाभार्थी,शेतकरी नव उद्योजक कर्ज लाभार्थी अक्षरशः त्रस्त झाले असून बँकांतील मनमानी कारभारा विरोधात कितीही तक्रारी केल्या अन् वर्तमान पत्रात कितीही वेळा वृत्त प्रकाशित झाले तरीही बँकांतील कारभार यत्किंचितही सुधारत नसल्याने 'गाढवा पुढ वाचली गिता अन् कालचा गोंधळ बराच होता' असा एकंदर कारभार झाल्याचे निदर्शनास येत असून राष्ट्रीयकृत बँकासह ग्राहकांच्या सुविधासाठी निर्माण केलेल्या एटीएमवर एकंदर गाढवांचे राज्य आले की काय ? असा प्रश्न उपस्थित होतांना दिसत असून शहरातील महाविर नगर परिसरातील स्टेट बँक ऑफ महाराष्ट्र,भारतीय स्टेट बँकेच्या एटीएम सुविधा केंद्र तर अक्षरशः गाढवांनीच ताब्यात घेतल्याचा प्रकार समोर आला आहे.

शहरातील बँकांसह एटीएमची सुविधा केंद्रांचा कारभार बघितल्यास 'गाढवांचा गोंधळ अन् लातांचा सुकाळ' अशी परिस्थिती पाहावयास मिळत असून सर्वसामान्य ग्राहकांच्या सुविधेसाठी उभारण्यात आलेल्या 'एटीएम' मशीन मध्ये वेळोवेळी होणारा बिघाड तसेच मशीन मध्ये बऱ्याच वेळेस पैसा उपलब्ध न राहणे त्यामुळे बँक ग्राहकांसाठी निरूपयोगी झालेली एटीएम केंद्र मात्र गाढवांसाठी निवासी सुविधा केंद्र झाल्याचे पाहून राष्ट्रीयकृत बँकांतील अधिकारी कर्मचाऱ्यांच्या अकार्यक्षम कारभाराची प्रत्यक्ष साक्ष देतांना पाहावयास मिळत असून शहरातील राष्टीयकृत बँकांच्या एटीएम केंद्रांची झालेली दुर्दैवी अवस्था पाहून संबंधित बँकांच्या खाजगी ग्राहक सुविधा केंद्रांकडे आपल्या मोर्चा वळवणाऱ्या ग्राहकांची अवस्था अग्नीतून निघून फुफाट्यात पडल्यागत होत असून खाजगी ग्राहक सुविधा केंद्रांतूनही बँक ग्राहकांची आर्थिक पिळवणूक होत असल्यामुळे बँक ग्राहकांच्या या आर्थिक लुटीला संबंधित बँकांतील अधिकारी कर्मचारीच जवाबदार असल्याचे ग्राहकांतून बोलले जात असून अधिकारी एटीएमच्या झालेल्या दुरावस्थेकडे जाणीवपूर्वक दुर्लक्ष करीत असल्यामुळे नाईलाजास्तव बँक ग्राहकांना आपला मोर्चा खाजगी ग्राहक सुविधा केंद्राकडे वळवावा लागत असल्याचे निदर्शनास येत असून एकंदर परिस्थिती बघितल्यास मोठ्या प्रमाणात आर्थिक उलाढाल होणाऱ्या या राष्ट्रीयकृत बँकांत सर्वत्र 'गाढवांचा गोंधळ अन् लातांचा सुकाळ' अशी परिस्थिती झाल्याचे निदर्शनास येत आहे.....