🌟मुंबईतील विमानतळावर एनआयएने आयसिस या दहशतवादी संघटनेच्या २ फरार दहशतवाद्यांना केली अटक...!

🌟छत्रपती शिवाजी महाराज आंतरराष्ट्रीय विमानतळावर शुक्रवारी रात्री दीडच्या सुमारास एनआयएने केली कारवाई🌟 

मुंबई :- पुण्यात स्फोटक बनवणे आणि त्याची चाचणीच्या प्रकरणात सहभागी असलेल्या आयसिएच्या दोन फरार दहशतवाद्यांना राष्ट्रीय तपास यंत्रणा अर्थात एनआयएने काल मुंबई विमानतळावर अटक केली आहे. मुंबईतील छत्रपती शिवाजी महाराज आंतरराष्ट्रीय विमानतळावर शुक्रवारी रात्री दीडच्या सुमारास एनआयएने ही कारवाई केली.

पाकिस्तानी दहशतवाद्यांनी जम्मू काश्मीरमधील बैसरन येथील पर्यटन स्थळावर केलेल्या हल्ल्यानंतर भारत सरकारने दहशतवाद्यांविरुध्द कठोर कार्यवाही सुरु केली आहे.देशातील सर्व राज्यांमध्ये सतर्कतेचा इशारा देण्यात आला होता. शुक्रवारी रात्री एनआयएने मुंबईतील विमानतळावर आयसिस या दहशतवादी संघटनेच्या स्लीपर मॉड्यूलचे सदस्य असलेल्या दोघांना अटक केली आहे. या दोघांची नावे अब्दुल्ला फैयाज शेख उर्फ डायपरवाला आणि तल्हा खान अशी आहेत. हे दोन्ही दहशतवादी मागील दोन वर्षांपासून फरार होते. राष्ट्रीय तपास संस्थेने (एनआयए) २०२३ मध्ये महाराष्ट्रातील पुण्यामध्ये आयईडी बनवण्याच्या आणि चाचणी करण्याच्या प्रकरणात बंदी घातलेल्या आयसिस दहशतवादी संघटनेचे ते सदस्य आहेत. मुंबई आंतरराष्ट्रीय विमानतळावरील टी-२ टर्मिनसवर इमिग्रेशन ब्युरोने जकार्ता, इंडोनेशिया येथून भारतात परतण्याचा प्रयत्न करीत होते. त्याचवेळी या दोघांनाही एनआयएच्या पथकाने सुरुवातीला ताब्यात घेवून अटक केली. पुण्यात जानेवारी २०२३ मध्ये लोणीकांड येथे किरायाने घेतलेल्या एका गोडाऊनमधून या दोघांसह इतरांनी स्फोटके तयार करण्याचे वर्कशॉप उघडले होते. एनआयएने या प्रकरणात या दोघांसह दहा जणांवर गुन्हा दाखल केला आहे. या प्रकरणात आठ जणांना अटक करण्यात आली होती. हे दोघे त्यावेळी फरार होण्यात यशस्वी झाले होते. याच प्रकरणात त्यांच्याविरुद्ध मुंबईतील एनआयएच्या विशेष न्यायालयाने अजामीनपात्र वॉरंट जारी केले होते. एनआयएनकडून या दोघांबद्दल माहिती देणाऱ्यास प्रत्येकी ३ लाखाचे बक्षिस जाहीर केले होते. हे दोघेही पुण्यातील गुन्हेगारी कटात सहभागी आहेत. त्यांनी हिंसाचार आणि दहशतीद्वारे देशात इस्लामिक राज्य स्थापित करण्याच्या आयसिसच्या अजेंडाला पुढे नेण्यासाठी भारत सरकारविरुद्ध युद्ध पुकारून भारताची शांतता आणि सांप्रदायिक सौहार्द बिघडवण्याच्या उद्देशाने दहशतवादी कृत्ये करण्याचा कट रचला होता. पुण्यातील कोंढवा येथे अब्दुल्ला फैयाज शेख यांनी भाड्याने घेतलेल्या घरात आयईडी तयार करत होते. २०२२-२०२३ मध्ये त्यांनी या परिसरात बॉम्ब बनवण्याच्या आणि प्रशिक्षण कार्यशाळेचे आयोजन केले होते. यामध्ये दोघांनी सहभाग घेतला होता, तसेच त्यांनी बनवलेल्या आयईडीची चाचणी घेण्यासाठी नियंत्रित स्फोट घडवून आणला होता. भारतविरोधी आयसिसच्या हिंसक आणि नापाक दहशतवादी योजनांना हाणून पाडण्यासाठी एनआयएने यापूर्वी या प्रकरणातील सर्व १० आरोपींवर युए (पी) कायदा, स्फोटक पदार्थ कायदा, शस्त्रास्त्र कायदा आणि आयपीसीच्या विविध कलमांखाली आरोपपत्र दाखल केले होते. अब्दुल्ला फैयाज शेख आणि तल्हा खान यांच्याव्यतिरिक्त, या प्रकरणात अटक करण्यात आलेल्या इतरांची ओळख पटली आहे. मोहम्मद इम्रान खान, मोहम्मद युनूस साकी, अब्दुल कादिर पठाण, सिमब नसिरुद्दीन काझी, झुल्फिकार अली बडोदावाला, शमिल नाचन, अकिफ नाचन आणि शाहनवाज आलम अशी या प्रकरणामध्ये यापूर्वीच अटक करण्यात आलेल्या आरोपींची नावं आहेत. या प्रकरणाचा पुढील तपास एनआयए कसून करीत आहे......