🌟पुर्णा तालुक्यातल्या फुलकळस येथील विद्यार्थिनीला २५ मिनिटांत मिळाले ओबीसी-एनसीएल प्रमाणपत्र....!

(निवासी उपजिल्हाधिकारी अनुराधा ढालकरी)

🌟निवासी उपजिल्हाधिकारी अनुराधा ढालकरी यांच्या मदतीने अवघ्या २५ मिनिटांत हे प्रमाणपत्र तिला तयार करून देण्यात आलं🌟

🌟गतीमान परभणी जिल्हा प्रशासनाचे तिने मानले आभार : जेईई-ऍडव्हान्सचा वेळेत भरता आला फॉर्म🌟

परभणी :- परभणी जिल्ह्यातील पुर्णा तालुक्यातल्या फुलकळस येथील तृप्ती विश्वनाथ सलगर या विद्यार्थिनीला अवघ्या २५ मिनिटांत ओबीसी-एनसीएल प्रमाणपत्र मिळाले अभ्यासात प्रावीण्य गाठण्याचा निर्धार असलेल्या विद्यार्थ्यांसाठी प्रशासन जर तत्पर आणि संवेदनशील असेल, तर अशक्य वाटणारी कामेही शक्य होऊ शकतात परभणी जिल्ह्यातील तृप्ती विश्वनाथ सलगर राहणार फुलकळस, तालुका पूर्णा या विद्यार्थिनीला याचं प्रत्यक्ष उदाहरण अनुभवायला मिळालं. गतीमान परभणी जिल्हा प्रशासनाचे तिने आभार मानले. 

जेईई-ऍडव्हान्सचा  फॉर्म भरण्याचा शेवटचा दिवस असताना, तृप्तीकडे ओबीसी-एनसीएल प्रमाणपत्र नव्हतं. सामान्यतः हे प्रमाणपत्र मिळवायला २० दिवस ते एक महिना लागतो. पण  निवासी उपजिल्हाधिकारी अनुराधा ढालकरी यांच्या मदतीने अवघ्या २५ मिनिटांत हे प्रमाणपत्र तिला तयार करून देण्यात आलं तृप्तीच्या वडिलांचा नुकताच अपघात झाल्याने संपूर्ण कुटुंब त्या काळजीत व्यस्त होतं. या धावपळीत फॉर्म भरण्याची अंतिम तारीख तिच्या लक्षात राहिली नाही. जेव्हा तिने फॉर्म भरण्याचा प्रयत्न केला, तेव्हा प्रमाणपत्र नसल्याचं लक्षात आलं. काही जणांनी जिल्हाधिकाऱ्यांची सही घेतल्यास चालेल असं सांगितलं, म्हणून ती थेट जिल्हाधिकारी कार्यालयात पोहोचली मात्र,अनुराधा मॅडम यांनी स्पष्ट सांगितलं की केवळ सही चालणार नाही, मूळ प्रमाणपत्रच आवश्यक आहे. अशा वेळी निराश झालेल्या तृप्तीला धीर देत मॅडम म्हणाल्या, "काळजी करू नकोस, मी मदत करेन."

यानंतर त्यांनी पूर्णा तहसीलदार माधवराव बोथीकर, गंगाखेड उपविभागीय अधिकारी जिवराज डापकर, आणि ताडकळस सेतू केंद्र चालक यांच्याशी तत्काळ संपर्क साधून २५ मिनिटांत ओबीसी-एनसीएल प्रमाणपत्र उपलब्ध करून दिलं हे फक्त एका विद्यार्थिनीसाठी केलेलं साहाय्य नव्हतं. तृप्तीने सांगितल्यानुसार, मॅडम प्रत्येक अभ्यागताच्या समस्येकडे तितक्याच आत्मीयतेने आणि तत्परतेने प्रतिसाद देत होत्या. प्रशासनातील ही मानवीता आणि कार्यक्षमतेचं दर्शन तिच्यासारख्या विद्यार्थ्यांना नवी ऊर्जा देणारी आहे तृप्तीने सांगितलं, "जरी मी चुकीची माहिती घेऊन आले होते, तरी योग्य व्यक्तीकडे पोहोचले. अशा जबाबदार महसूल प्रशासनाची मी मन:पूर्वक आभारी आहे."