🌟पश्चिम बंगालच्या मुख्यमंत्री बॅनर्जी यांचा केंद्र सरकार विरोधात एल्गार : पश्चिम बंगालमध्ये 'वक्फ' विधेयक लागू होणार नाही...!

🌟ममता बॅनर्जी यांनी 'वक्फ बोर्ड' विधेयका विरोधात घेतली ठाम भूमिका🌟

कोलकाता : केंद्रातील पंतप्रधान नरेंद्र मोदी यांच्या नेतृत्वाखालील एनडीए सरकारने लोकसभा/राज्यसभा या दोन्ही सभागृहात पास केलेल्या 'वक्फ बोर्ड सुधारणा' विधेयकावर राष्ट्रपती द्रौपदी मुर्मू यांची स्वाक्षरी होऊन त्याचे कायद्यामध्ये रूपान्तर झाले असले तरी या विधेयकाला सुरुवातीपासूनच विरोध करणाऱ्या ममता बॅनर्जी यांच्या तृणमूल काँग्रेसने आता ठाम विरोध करण्याची भूमिका घेतली आहे पश्चिम बंगालमध्ये वक्फ सुधारणा विधेयक लागू होणार नसल्याचे पश्चिम बंगालच्या मुख्यमंत्री ममता बॅनर्जी यांनी स्पष्ट करुन एकप्रकारे केंद्र सरकार विरोधात एल्गारच पुकारल्याचे पाहावयास मिळत आहे.

ममता बॅनर्जी म्हणाल्या वक्फ कायदा मंजूरच व्हावयास नको होता. पश्चिम बंगालमध्ये ३३ टक्के अल्पसंख्याक आहेत. मी त्यांचे काय करणार, ममता यांनी वक्फ सुधारणा विधेयकासंदर्भात पक्षाची स्पष्ट भूमिका मांडली आहे. बुधवारी कोलकात्यामध्ये जैन समुदायातर्फे आयोजित करण्यात आलेल्या एका कार्यक्रमाला ममता बॅनर्जी प्रमुख अतिथी म्हणून आमंत्रित होत्या. या कार्यक्रमात ममता बॅनर्जी यांनी वक्फ सुधारणा विधेयकाबाबत पक्षाची व पश्चिम बंगाल सरकारची भूमिका स्पष्ट केली.

💫राजकीय चळवळीसाठी काही लोक तुम्हाला भडकवण्याचा प्रयत्न करतील पण त्यांच्या भडकवण्याकडे तुम्ही दुर्लक्ष करा - ममता बॅनर्जी 

पश्चिम बंगालमध्ये वक्फ सुधारणा विधेयक लागू होणार नसल्याचे ममतांनी यावेळी स्पष्ट केले. मला कल्पना आहे की वक्फ सुधारणा विधेयक संसदेत मंजूर झाल्यामुळे तुमच्या मनात असंतोष आहे. पण बंगालमध्ये असे काहीही घडणार नाही ज्यातून 'फोडा आणि राज्य करा' धोरणातून एखादी व्यक्ती सत्ता गाजवेल. सगळ्यांनी एकत्र राहायला हवे आहे, असा संदेश तुम्ही द्या, असे ममता म्हणाल्या. राजकीय चळवळीसाठी काही लोक तुम्हाला भडकवण्याचा प्रयत्न करत असतील, पण त्यांच्या भडकवण्याकडे तुम्ही दुर्लक्ष करा, असे आवाहनही ममता यांनी उपस्थितांना केले.

💫पश्चिम बंगाल, बांगलादेश,पाकिस्तान आणि भारत हे सगळे एकत्रच होते.फाळणी नंतर झाली - ममता बॅनर्जी 

मुर्शिदाबादमध्ये वक्फ विधेयकावरून हिंसाचार झाल्याचे समोर आले असून त्या घटनेचाही उल्लेख ममता बॅनर्जी यांनी केला आहे. बांगलादेशच्या सीमाभागातील परिस्थिती तुम्ही पाहा. या परिस्थितीत वक्फ सुधारणा विधेयक मंजूरच व्हायला नको होते, असे त्या म्हणाल्या. इतिहासात लिहिले आहे की, पश्चिम बंगाल, बांगलादेश, पाकिस्तान आणि भारत हे सगळे एकत्रच होते. फाळणी नंतर झाली. पण आता जे इथे राहात आहेत, त्यांना संरक्षण देणे हे आपले काम आहे. जर लोक एकत्र राहिले, तर ते जग जिंकू शकतात. काही लोक तुम्हाला रस्त्यावर उतरण्यासाठी भडकवण्याचा प्रयत्न करतील. पण तुम्ही असे काही करू नका असे माझे तुम्हाला आवाहन आहे. तुम्ही लक्षात ठेवा की मी इथे आहे तोपर्यंत मी तुमचे आणि तुमच्या मालमत्तेचे रक्षण करेन, आपण एकमेकांवर विश्वास ठेवायला हवा, असेही ममतांनी यावेळी नमूद केले.