🌟परभणी शहरातून 14 एप्रिल रोजी अवजड वाहनांना वाहतूकीस प्रवेश बंदी.....!

🌟परभणी जिल्हा पोलिस अधिक्षकांचा निर्णय : नागरिकांना पर्यायी रस्ते वापरण्याचे आवाहन🌟

परभणी :- भारतीय घटनेचे शिल्पकार महामानव भारतरत्न डॉ. बाबासाहेब आंबेडकर यांच्या पूर्णाकृती पुतळा परिसरात 14 एप्रिल रोजी जयंती निमित्त आयोजित भरगच्च कार्यक्रमांच्या पार्श्‍वभूमीवर जिल्हा पोलिस प्रशासनाने शहरातून अवजड मालवाहू वाहनांना वाहतूकीकरीता प्रवेश बंदी केली आहे. वाहनधारकांनी या दिवशी पर्यायी रस्त्यांचा वापर करावा असे आवाहन पोलिस प्रशासनाने केले आहे.

 झिरोफाट्याकडून वसमत रस्त्याने, दैठण्याकडून गंगाखेड रस्त्याने, तर झरी कडून जिंतूर रस्त्याने व पेडगावकडून पाथरी रस्त्याने परभणी शहराकडे येणारी सर्व अवजड वाहनांची वाहतूक 14 एप्रिल रोजी सकाळी 5 वाजल्यापासून रात्री 12 वाजेपर्यंत अन्यत्र वळविण्यात आली आहे. संबंधित अवजड वाहनधारकांनी या वेळेत पर्यायी रस्त्यांचा वाहतूकीसाठी वापर करावा. वसमत कडून येणार्‍या वाहनांनी झिरोफाटा, पूर्णा, ताडकळस, सिंगणापूर फाटा मार्गे गंगाखेड व पाथरीकड जाण्याकरीता वळण रस्त्याचा वापर करावा, किंवा औंढा नागनाथ, जिंतूर रस्त्याने जिंतूर व जालनाकडे पुढे जावे. तसेच कोल्हा पाटीकडून येणार्‍या वाहनधारकांनी देगांवफाटा, जिंतूर, औंढा, वसमत या मार्गाचा वापर करावा, पाथरी, पोखर्णी फाटा, ताडकळस मार्गे नांदेड या पर्यायी मार्गाचा वापर करावा.

💫शहर वाहतूकीकरीताही पर्यायी मार्ग :-

           परभणी शहरातील स्थानिक रहिवाशी असणार्‍या वाहनधारकांनी 14 एप्रिल रोजी सकाळी 6 वाजेपासून रात्री 10.30 वाजेपर्यंतच्या कालावधीत डॉ. बाबासाहेब आंबेडकर पुतळ्यासमोरुन ये-जा करणे  पूर्णतः टाळावे, अन्य पर्यायी मार्गाचा वाहतूकीसाठी वापर करावा, असे आवाहन जिल्हा पोलिस यंत्रणेने केले आहे. डॉ. बाबासाहेब आंबेडकर पुतळ्याकडे अभिवादनाकरीता येणार्‍या नागरीकांनी त्यांची वाहने परिसरातील मैदानावर उभी करावी, तर जिंतूर व गंगाखेड रस्त्यावरुन येणार्‍या नागरिकांनी लक्ष्मी नारायण मंगल कार्यालयासमोर ट्रॅव्हल्स कार्यालयाच्या बाजूने वाहने उभी करावी, असे आवाहन पोलिस प्रशासनाने केले आहे.....