🌟अमेरिकेचे राष्ट्राध्यक्ष डोनाल्ड ट्रम्प यांनी जगातील ४१ देशांवर अमेरिका प्रवेशबंदी करण्याची आखली योजना ?

🌟दरम्यान ४१ देशांना अमेरिकेत प्रवेश बंदी करण्याच्या प्रस्तावात देशांचे तीन श्रेणीत विभाजन करण्यात आले आहे🌟

वॉशिंग्टन : अमेरिकेचे राष्ट्राध्यक्ष डोनाल्ड ट्रम्प यांनी अमेरिकेतील बेकायदेशीर स्थलांतरित,आयात शुल्क धोरण या पाठोपाठ आता जगातील ४१ देशांवर अमेरिकेत प्रवेशबंदी करण्याची योजना आखली आहे कोणत्या देशातील नागरिकांवर अमेरिकेत निर्बंध असतील त्याची यादीही ट्रम्प यांनी तयार केली असल्याचे वृत्त असून एकूण तीन याद्यांपैकी दुसऱ्या यादीत पाकिस्तानचा समावेश आहे. अमेरिकेतील एका प्रथितयश वृत्तपत्राच्या हवाल्याने भारतातील एका अग्रगण्य इंग्रजी दैनिकाने हे वृत्त दिले आहे.

दरम्यान ४१ देशांना अमेरिकेत प्रवेश बंदी करण्याच्या प्रस्तावात देशांचे तीन श्रेणीत विभाजन करण्यात आले आहे. यामध्ये एक रेड यादी, ज्यांच्या नागरिकांना प्रवेशापासून पूर्णपणे बंदी घातली जाईल. एक ऑरेंज यादी, जी निवडक निर्बंध लादेल. विशेषतः गैर-व्यावसायिक प्रवाशांवर निर्बंध असतील तसेच येलो यादी असेल. ज्या देशांना सुरक्षा कमतरता दूर करण्यासाठी किंवा अधिक प्रतिबंधात्मक यादीत ठेवण्याचा धोका आहे, त्यांना ६० दिवसांची अंतिम मुदत देण्यात येणार आहे.

💫निर्णयासाठी जोरदार हालचाली सुरू :-

सदर प्रस्तावित प्रवास बंदी डोनाल्ड ट्रम्प यांच्या पहिल्या कार्यकाळात लागू केलेल्या प्रवास निर्बंधांपेक्षा व्यापक असेल, अशी माहिती दिली जात आहे. याबाबत सध्या उच्च राजनैतिक आणि सुरक्षा अधिकाऱ्यांकडून विचार सुरु आहे. परराष्ट्र विभाग, गृह सुरक्षा विभाग आणि इतर गुप्तचर संस्थांचे अधिकारी याबाबतचा आढावा घेत असून यावर अद्याप अंतिम निर्णय झालेला नाही. मात्र, या निर्णयासाठी हालचाली सुरू असल्याचे सांगितले जात आहे.

💫अमेरिका प्रवेश बंदीतल्या पहिल्या यादीतील देश :-

ट्रम्प यांच्या प्रशासनाने ४१ देशांच्या ३ याद्या तयार केल्या आहेत. यामधील पहिल्या रेड यादीत अफगाणिस्तान, भूतान, क्युबा, इराण, लिबिया, उत्तर कोरिया, सोमालिया, सुदान, सीरिया, व्हेनेझुएला या १० देशांचा समावेश असेल. या देशातील नागरिकांना अमेरिकेत प्रवास करण्याची परवानगी दिली जाणार नाही.

💫अमेरिका प्रवेश बंदीतील दुसरी यादी :-

ऑरेंज यादीत १० देशांचा समावेश असणार आहे. ज्यांच्यासाठी प्रवास प्रतिबंधित असेल, परंतु पूर्णपणे बंद केला जाणार नाही. या यादीत बेलारूस, इरिट्रिया, हैती, लाओस, म्यानमार, पाकिस्तान, रशिया, सिएरा लिओन, दक्षिण सुदान आणि तुर्कमेनिस्तान या देशांच्या नागरिकांना अधिक कडक प्रक्रिया पूर्ण करणे बंधनकारक असेल.