🌟राज्याचे उपमुख्यमंत्री एकनाथ शिंदे यांच्याबद्दल कॉमेडियन कुणाल कामराने केलेल्या कवितेवरून सभागृहात गदारोळ...!

🌟राज्याच्या उच्च पदस्थ नेत्यांबद्दल सुपारी घेऊन काहीही बोलणाऱ्यांना कद्दापी सोडणार नाही - मुख्यमंत्री फडणवीस 

मुंबई (दि.२४ मार्च २०२५) - राज्याचे माजी मुख्यमंत्री तथा विद्यमान उपमुख्यमंत्री भाई एकनाथ शिंदे यांच्याबद्दल कॉमेडियन कुणाल कामराने केलेल्या कवितेवरून आज सोमवार दि.२४ मार्च रोजी विधानसभेत प्रचंड गदारोळ झाला यावेळी सभागृहाचे कामकाज पाच मिनिटांसाठी तहकूब करावे लागले त्यानंतर राज्याचे मुख्यमंत्री देवेंद्र फडणवीस यांनी सभागृहात निवेदन करत सुपारी घेऊन राज्याच्या उच्च पदस्थ नेत्यांबद्दल काहीही बोलणाऱ्यांना कद्दापी सोडणार नाही कोणी कितीही दबाव आणला तरी लेफ्ट लिबरल,अर्बन नक्षल यांच्यावर कठोरात कठोर कारवाई केली जाईल असा इशारा मुख्यमंत्री देवेंद्र फडणवीस यांनी विधानसभेत दिला आहे.

कॉमेडियन कुणाल कामराच्या एका व्हिडिओमुळे महाराष्ट्राच्या राजकारणात धुमाकूळ घातला आहे. विधिमंडळाचे अर्थसंकल्पीय अधिवेशन सुरु आहे. याच दरम्यान कुणाल कामराचा व्हिडिओ समोर आला आहे. ठाणे की रिक्षा ही कविता त्याने सादर केली. यामध्ये उपमुख्यमंत्री एकनाथ शिंदे यांना गद्दार म्हटले आहे. यामुळे मोठा वादंग निर्माण झाला आहे. उपमुख्यमंत्री एकनाथ शिंदे यांच्याबद्दल ठाणे का रिक्षा अशी कविता सादर करत कुणाल कामराने टिप्पणी केली. त्यानंतर भाजप आणि शिवसेनेचे (शिंदे) मंत्री, आमदार विधानसभेत आक्रमक झाले. सत्ताधारी आमदारांनी वेलमध्ये येऊन कामरावर कारवाईची मागणी केली. यामुळे सभागृहात गोंधळाची स्थिती निर्माण झाली. विधानसभाध्यक्ष राहुल नार्वेकर यांनी सभागृहाचे कामकाज पाच मिनिटांसाठी तहकूब केले. तत्पूर्वी शिवसेना शिंदे गटाचे आमदार अर्जुन खोतकर यांनी कुणाल कामराने हिंदू धर्माचा अपमान केल्या असल्याचे म्हणत यामुळे दंगली होतील असे वक्तव्य केले. याला विरोधकांनी आक्षेप घेतला. यामुळे सभागृहात गदारोळ झाला. सभागृहाचे कामकाज पुन्हा सुरु झाल्यानंतर मुख्यमंत्री देवेंद्र फडणवीस यांनी निवेदन केले. मुख्यमंत्री फडणवीस म्हणाले की, अभिव्यक्ती स्वातंत्र्य आम्ही देखील मानतो. अभिव्यक्ती स्वातंत्र्य स्वैराचाराकडे जात असेल तर ते अमान्य आहे. सुपारी घेऊन कोणी काम करत असेल आणि राज्याच्या उच्च पदस्थ नेत्यांबद्दल काहीही बोलत असेल तर त्यांना सोडणार नाही, असा इशारा मुख्यमंत्री फडणवीसांनी दिला. स्टँडअप कॉमेडी करण्याचा अधिकार आहे. पण, स्वातंत्र्याचा स्वैराचार करण्याचा अधिकार कुणालाही नाही. महाराष्ट्राच्या जनतेने २०२४ साली कोण गद्दार आणि कोण खुद्दार हे दाखवून दिलेले आहे, असेही मुख्यमंत्री फडणवीस म्हणाले. विरोधकांकडून कुणाल कामराचे समर्थन होत असल्यावरुनही मुख्यमंत्री संतप्त झाले. ते म्हणाले की, सुपारी घेऊन कोणी राज्याच्या उच्च पदस्थ नेत्यांबद्दल काहीही बोलत असेल आणि सभागृहातील पहिल्या बाकावरील लोक त्याचे समर्थन करत आहेत. कामराचे आणि यांचे काही ठरवून चालले आहे का? असा सवाल मुख्यमंत्र्यांनी विरोधकांना केला. शिवसेना शिंदे गटाकडून अनकॉन्टिनेंटल हॉटेलमधील स्टुडिओची तोडफोड केल्यानंतर कुणाल कामराने संविधानाची प्रत हातात घेऊन सोशल मीडियामध्ये एक पोस्ट केली आहे, त्यावर मुख्यमंत्री फडणवीस म्हणाले की, कामरा संविधानाची लाल प्रत घेऊन फिरतो. संविधानाने सर्वांना स्वातंत्र्य दिले आहे, मात्र कोणालाही अपमानीत करण्याचा अधिकार दिलेला नाही. सुपऱ्या घेऊन कोणी अपमानीत करणार असेल तर त्यांच्यावर कारवाई केली जाईल, असा इशारा त्यांनी कुणाल कामराला दिला आहे.......