🌟नागपूर हिंसाचार प्रकरणातील मास्टरमाईंड दंगलखोर फहीम खानच्या अनधिकृत घरावर बुलडोझर : फहीमचे घर जमीनदोस्त...!

🌟दंगलीतील अन्य दंगलखोरांच्या घरातील अनधिकृत भागही प्रशासनाने उध्वस्त केला🌟

नागपूर : नागपूर शहरात दि.१७ मार्च २०२५ रोजी औरंगजेब कबरीच्या प्रकरणावरुन उसळलेल्या दंगल व हिंसाचार प्रकरणातील मास्टरमाईंड मुख्य आरोपी फहीम खान याचे दोन मजली अनधिकृत घर सोमवार दि.२४ मार्च २०२५ रोजी अत्यंत कडेकोट बंदोबस्तात पालिकेच्या अधिकाऱ्यांनी जमीनदोस्त केले त्याचप्रमाणे अन्य आरोपी युसूफ शेख याच्या महाल परिसरातील घराचा अनधिकृत भागही तोडण्यात आल्याचे अधिकाऱ्यांनी सांगितले.

 दंगल व हिंसाचारातील मुख्य सुत्रधार असलेला फहीम खान हा 'मायनॉरिटी डेमोक्रॅटिक पार्टी'चा (एमडीपी) नेता असून त्याच्याविरुद्ध देशद्रोहाचा गुन्हा नोंदविण्यात आला आहे. नागपूरमध्ये १७ मार्च २०२५ रोजी हिंसाचाराचा उद्रेक झाला. त्याप्रकरणी फहीम याच्यासह १०० जणांना अटक करण्यात आली आहे नागपूर महापालिकेने काही दिवसांपूर्वी फहीम खान याला घराचे बांधकाम करताना अनेक त्रुटी केल्याबद्दल नोटीस पाठवली होती.

💫संपूर्ण परिसरावर ड्रोनने टेहळणी :-

नागपूरच्या यशोधरानगर, संजय बाग वसाहतीमध्ये फहीमचे घर असून सोमवारी सकाळी पालिकेच्या अधिकाऱ्यांनी तीन जेसीबी यंत्रांच्या सहाय्याने त्याचे घर जमीनदोस्त करण्यास सुरुवात केली. यावेळी कडेकोट बंदोबस्त ठेवण्यात आला होता. इतकेच नव्हे, तर संपूर्ण परिसरावर ड्रोनने टेहळणी करण्यात आली. कारवाई सुरू असताना परिसरात बॅरिकेड्सही लावण्यात आले होते.

💫'एमआरटीपी'न्वये कारवाई :-

फहीमचे घर त्याच्या आईच्या नावावर असून ते नागपूर इम्प्रूव्हमेंट ट्रस्टच्या भूखंडावर आहे आणि त्याचा भाडेकरार २०२० मध्ये संपुष्टात आला आहे, असेही अधिकाऱ्यांनी सांगितले. इमारतीचा मंजूर आराखडाही नव्हता. संपूर्ण बांधकाम अनधिकृत असल्याचे अधिकाऱ्यांनी सांगितले. 'एमआरटीपी' कायद्यान्वये ही कारवाई करण्यात आली. कारवाईपूर्वी २४ तास अगोदर नोटीस देण्यात आली होती, असेही अधिकाऱ्याने सांगितले. महाल परिसरातील जोहरीपुरा येथे अन्य आरोपी शेख यांच्या घराच्या बाल्कनीचा अनधिकृत भागही पाडून टाकण्यात आला दरम्यान, महापालिकेने नोटीस बजावल्यानंतर फहीम खानचे कुटुंबीय भयभीत झाले आणि ते रविवारी रात्रीच घरून निघून त्यांच्या नातेवाईकडे गेल्याचे स्थानिकांचे म्हणणे आहे.

नागपूरमध्ये आठ दिवसांपूर्वी दोन गटात तुफान राडा झाला होता. या घटनेत जाळपोळ आणि दगडफेक करण्यात आली. त्यात काही पोलीस कर्मचारी जखमी झाले होते. या संपूर्ण राडा प्रकरणात पोलिसांनी फहीम खान याला मुख्य सूत्रधार म्हणून ताब्यात घेतले आहे. सध्या फहीम खानची न्यायालयीन कोठडीत रवानगी करण्यात आली आहे. त्यानंतर सोमवारी नागपूर पालिकेने फहीम खान याच्या घरावर तोडकाम कारवाई केली....

💫'बुलडोझर' कारवाईला कारवाईला स्थगिती : कारवाई करण्यापूर्वी प्रशासनाने घरमालकांचे म्हणणे का ऐकले नाही - उच्च न्यायालय

नागपूर शहरातील महाल व हंसापुरीत झालेल्या दंगल व जाळपोळीच्या घटनेचा कथित सूत्रधार फहीम खान शमीम खान व आरोपी युनूस अब्दुल हाफिज यांच्या घरावरील बुलडोझर कारवाईवरून मुंबई उच्च न्यायालयाच्या नागपूर खंडपीठाने नाराजी व्यक्त करीत सोमवारी प्रशासनाच्या मनमानी कारभाराला चांगलीच चपराक दिली आणि या कारवाईला स्थगिती दिली. कारवाई करण्यापूर्वी प्रशासनाने घरमालकांचे म्हणणे का ऐकून घेतले नाही, असा सवालही न्यायालयाने केला. या कारवाईमुळे सर्वोच्च न्यायालयाच्या निर्णयाचे उल्लंघन झाले, असे प्राथमिक पुरावे न्यायालयाला आढळून आले. कारवाई करताना घरमालकांना सुनावणीची संधी देण्यात आली नाही. मनमानी व एकतर्फी पद्धतीने कारवाई करण्यात आली, असेही न्यायालयाने म्हटले आहे. न्यायालयाने महानगरपालिकेला नोटीस बजावून येत्या १५ एप्रिलपर्यंत वादग्रस्त कारवाईवर स्वतःची भूमिका स्पष्ट करण्याचे निर्देश दिले. तसेच, वादग्रस्त कारवाईला स्थगिती दिली.