🌟शिवसेना राष्ट्रीय नेते तथा उपमुख्यमंत्री एकनाथ शिंदे यांच्या विरोधात वादग्रस्त गायन करणारा कामराच्या स्टुडिओची तोडफोड...!

🌟शिवसैनिकांनी खार येथील युनिकॉन्टिनेन्टल हॉटेलमध्ये असलेल्या हॅबिटॅट स्टुडिओवर हल्ला चढवून सेटची तोडफोड केली🌟

मुंबई : महाराष्ट्र राज्याचे माजी मुख्यमंत्री तथा विद्यमान उपमुख्यमंत्री तथा शिवसेनेचे राष्ट्रीय अध्यक्ष भाई एकनाथ शिंदे यांच्या विरोधात स्टैंडअप कॉमेडियन कुणाल कामरा याने केलेल्या आक्षेपार्ह विडंबनात्मक गाण्यामुळे संतप्त शिवसैनिकांनी रविवार दि.२३ मार्च २०२५ रोजी रात्री खार येथील युनिकॉन्टिनेन्टल हॉटेलमध्ये असलेल्या हॅबिटॅट स्टुडिओवर हल्ला चढवून सेटची तोडफोड केली.

 या गाण्यातून एकनाथ शिंदे यांची बदनामी केल्याचा आरोप करत शिवसेना आमदार मुरजी पटेल यांनी अंधेरी एमआयडीसी पोलीस ठाण्यात तक्रार केली आहे. तर शिंदे गटाचे नेते राहुल कनाल यांनी कुणाल कामरा, संजय राऊत, राहुल गांधी आणि आदित्य ठाकरे यांच्याविरोधात पोलिसांत तक्रार दाखल केली आहे. या गाण्याचे पडसाद विधानसभेतही उमटले असून कुणाल कामराचे सीडीआर तपासण्यात येतील तसेच त्याच्या बँक खात्याचीही चौकशी केली जाणार असल्याची माहिती गृह राज्यमंत्री योगेश कदम यांनी सभागृहात दिली कुणाल कामरा याने बॉलिवूडच्या एका गाण्याची वेगळ्या शब्दांमध्ये नक्कल करत विडंबनात्मक काव्य रचले. त्यात एकनाथ शिंदे आणि त्यांच्या शिवसेनेतील बंडावर भाष्य केले. रविवारी हा व्हिडियो समाजमाध्यमांवर व्हायरल झाल्यानंतर रात्री त्याचे पडसाद उमटायला सुरुवात झाली. 

शिंदे गटाचे कार्यकर्ते आक्रमक झाले आणि त्याने ज्या ठिकाणी हा कार्यक्रम केला, त्या क्लबमधील खुच्र्यांची आणि संपूर्ण सेटची तोडफोड केली. बल्ब व ट्युबलाइट्स फोडल्या. पाठोपाठ ठाण्यातही शिवसेनेच्या समर्थकांनी जोरदार निर्देशने केली. वागळे इस्टेट पोलीस ठाण्याबाहेरही शिवसैनिकांनी कुणाल कामराची छायाचित्रे जाळली. त्यानंतर याप्रकरणी शिवसेनेच्या युवासेनेचे सरचिटणीस राहुल कनाल आणि इतर १९ जणांविरुद्ध गुन्हा दाखल करण्यात आला आहे. दरम्यान, याप्रकरणी पोलिसांनी ११ शिवसैनिकांना अटक केली होती. त्यांना कोर्टात हजर केल्यानंतर सुरुवातीला न्यायालयीन कोठडी सुनावण्यात आली. त्यानंतर त्यांच्यामार्फत जामिनासाठी अर्ज करण्यात आल्यानंतर कोर्टाने सर्वांना १५ हजार रुपयांच्या जातमुचलक्यावर जामीन मंजूर केला.

दरम्यान, याप्रकरणी कुणाल कामराने माफी मागण्यास नकार दिला आहे. कोर्टाने सांगितले तरच आपण माफी मागू, असा पवित्रा त्याने घेतला आहे. तोडफोडीच्या घटनेनंतर विरोधकांनी सत्ताधारी महायुतीला लक्ष्य केले आहे. कामराला रस्त्यावर फिरु देणार नाही, असा इशारा शिवसेनेच्या नेत्यांनी दिला आहे.....