🌟दिल्ली उच्च न्यायालयाच्या न्यायाधीशांच्या बंगल्यात आग ; आग विझवतांना हाती लागली मोठ्या प्रमाणात रोकड....!

🌟न्यायाधिश यशवंत वर्मा यांच्या सरकारी बंगल्यात मोठ्या प्रमाणात रोकड सापडल्यानं खळबळ उडाली🌟

नवी दिल्ली : दिल्ली उच्च न्यायालयाच्या न्यायाधिशांच्या घराला अचानक मोठी आग लागली ही आग विझवतांना न्यायाधिशांच्या बंगल्यात मोठ्या प्रमाणात रोकड हाती लागली. त्यानंतर सर्वोच्च न्यायालयानं कॉलेजियमनं न्यायाधीश यशवंत वर्मा यांच्या बदलीची शिफारस केली आहे. मुख्य न्या. संजीव खन्ना यांच्या नेतृत्त्वाखालील तीन वरिष्ठ न्यायमूर्तीनी वर्मा यांना त्यांच्या मूळ न्यायालयात म्हणजेच अलाहाबाद उच्च न्यायालयात पाठवण्याची शिफारस केली आहे.

न्या.यशवंत वर्मा यांच्या सरकारी बंगल्यात मोठ्या प्रमाणात रोकड सापडल्यानं खळबळ उडाली आहे. याची माहिती मिळताच सरन्यायाधीश संजीव खन्ना यांच्या नेतृत्त्वात सर्वोच्च न्यायालयानं त्यांची पुन्हा अलाहाबाद उच्च न्यायालयात बदली करण्याचा निर्णय घेतला आहे. ज्यावेळी बंगल्याला आग लागली, तेव्हा न्या. वर्मा घरात नव्हते. त्यांच्या कुटुंबातील सदस्यांनी आग विझवण्यासाठी अग्निशमन दलाला फोन केला होता. घटनास्थळी पोलीस देखील दाखल झाले होते. आग विझवल्यानंतर अग्निशमन दलाच्या कर्मचाऱ्यांना बंगल्याच्या आत मोठ्या प्रमाणात रोख रक्कम सापडली. न्यायमूर्तीच्या विरोधात अहवाल आल्यानंतर गुरुवारी कॉलेजियमची तातडीनं बैठक बोलावण्यात आली. या प्रकरणात इन हाऊस तपासावरही विचार सुरु आहे. त्यावर अद्याप तरी कोणताही निर्णय घेण्यात आलेला नाही. न्या. यशवंत वर्मांना ऑक्टोबर २०२१ मध्ये अलाहाबादहून दिल्ली उच्च न्यायालयात पाठवण्यात आलं होतं. आता त्यांच्या बदलीची शिफारस झालेली आहे. त्यांची चौकशी होण्याची शक्यता आहे. महाभियोग प्रक्रिया सुरु करण्याची चर्चाही जोर धरु लागली आहे. सर्वोच्च न्यायालयाच्या कॉलेजियमच्या काही सदस्यांनी या संपूर्ण घटनाक्रमाबद्दल चिंता व्यक्त केली आहे......