🌟जातवैधता प्रमाणपत्र सादर करण्यासाठी ग्रामपंचायत सदस्यांना आणखीन एक संधी देण्यात यावी.....!

🌟आमदार राजेश विटेकर यांनी वेधले जात प्रमाणपत्र अपात्रतेकडे सभागृहाचे लक्ष🌟

परभणी :- जातवैधता प्रमाणपत्र सादर करण्यासाठी ग्रामपंचायत सदस्यांना आणखीन एक संधी देण्यात यावी अशी मागणी पाथरी विधानसभा मतदारसंघाचे राष्ट्रवादी काँग्रेस पक्षाचे आमदार राजेश विटेकर यांनी विधानसभा सभागहातून केली.

 परभणी जिल्ह्यातील २१५ ग्रामपंचायत सदस्यांनी जात वैधता प्रमाणपत्र सादर न केल्याने राखीव प्रभागातील असणार्‍या या ग्रामपंचायत सदस्यांवर अपात्रतेची कारवाई करण्यात आलेली आहे. या प्रकरणी या सदस्यांना जुलै २०२३ च्या अध्यादेशाप्रमाणे मुदतवाढ देण्यात आली होती, परंतु प्रमाणपत्र सादर करू न शकल्याने त्या सदस्यांना अपात्र ठरविण्यात आले आहे, असे आमदार विटेकर यांनी सभागृहाच्या निदर्शनास आणून दिले. या प्रकरणात दुसरी व महत्त्वाची बाजू आहे, ती म्हणजे परभणी जिल्ह्यासह मराठवाड्यातील इतर जिल्ह्यासाठी जात पडताळणी समिती अध्यक्ष यांची नेमणूक झालेली नसल्याने चार - चार जिल्ह्यांसाठी एकच अध्यक्ष प्रभारी म्हणून कार्यभार पाहत होते. त्यामुळे ते अधिकारी कामाच्या अतिरिक्त भारामुळे सर्व ठिकाणची प्रकरणे विहित मुदतीत निकाली काढू शकले नाहीत. तसेच या दरम्यान एका अधिकारी आर्थिक मागणी पूर्ण केल्याशिवाय जात प्रमाणपत्र देतच नव्हत्या, अडवणूक करत होत्या, म्हणून त्यांना विधानमंडळाने निलंबित केल्याची घोषणासुद्धा केली होती,  याकडेही विटेकर यांनी सरकारचे लक्ष वेधले.

           १५ दिवसापूर्वीच राज्य शासनाने अनेक जात पडताळणी समित्यांच्या अध्यक्षांच्या नियुक्त्या केल्या आहेत. त्यामुळे सर्व ठिकाणचा कारभार सुरळीत होऊन वेळेतच गरजूंना जात प्रमाणपत्रे मिळतील, अशी अपेक्षा आहे. वरील सर्व बाबींचा विचार करून अपात्र ठरविलेल्या त्या ग्रामपंचायत सदस्यांना जात प्रमाणपत्र मिळविण्यासाठी आणखीन एक संधी देण्यात यावी, त्यासाठी वरील सर्व तांत्रिक अडचणी समजून घेऊन राज्य शासनाने सदरील २१५ ग्रामपंचायत सदस्यांच्या अपात्रतेस स्थगिती देण्यासाठीची कारवाई करून त्यांना न्याय द्यावा, अशी अपेक्षा व्यक्त केली. वरील तांत्रिक बाबींचा आधार घेऊन ते ग्रामपंचायत सदस्य खर्चिक व वेळ काढू अशा न्यायालयीन प्रक्रियेमधून न्याय मिळवू शकणार नाहीत, त्याऐवजी शासनाने स्थगिती देऊन त्यांचे पद अबाधित ठेवण्याबाबतचे आदेश द्यावेत, असे विटेकर यांनी म्हटले.....