🌟समाजवादी पक्षाचे आमदार अबू आझमींच्या वादग्रस्त वक्तव्याचे विधिमंडळात तीव्र पडसाद....!

🌟'औरंगजेब हा उत्तम प्रशासक होता' अबु आझमी यांच्या या वक्तव्याचे तीव्र पडसाद🌟

मुंबई :- औरंगजेब हा उत्तम प्रशासक होता, असे वक्तव्य समाजवादी पक्षाचे आ.अबू आझमी यांनी काल केले होते. या वक्तव्यावर राज्याचे उपमुख्यमंत्री एकनाथ शिंदे यांनी संताप व्यक्त केला होता. याप्रकरणाचे पडसाद आज विधिमंडळाच्या दोन्ही सभागृहात उमटले. अखेर अबू आझमी यांनी आपले वादग्रस्त विधान मागे घेत असल्याचे जाहीर केल्यानंतर या वादावर आता पडदा पाडण्याचा प्रयत्न झाला.

राज्य विधिमंडळाच्या अर्थसंकल्पीय अधिवेशना दरम्यान समाजवादी पक्षाचे आ. अबू आझमी यांनी औरंगजेब हा उत्तम प्रशासक असल्याचे वक्तव्य केले होते. यावर माजी मुख्यमंत्री तथा विद्यमान उपमुख्यमंत्री एकनाथ शिंदे यांनी संताप व्यक्त केला होता. विधिमंडळ अधिवेशनाचे आजच्या दुसऱ्या दिवशीचे कामकाज सुरु होताच आ. आझमी यांच्या वक्तव्याचे पडसाद आज विधानसभा आणि विधानपरिषदेत उमटले. अबू आझमी यांच्या वक्तव्यावर सत्ताधाऱ्यांनीच सभागृहात गोंधळ घालण्याचा प्रयत्न केला. त्यांनी काही काळ कामकाज चालल्यानंतर सभागृह तहकूब करण्यात आले. मात्र त्याआधी विधान परिषदेत भाजपा गटनेते प्रवीण दरेकर आणि विधान परिषद विरोधी पक्षनेते अंबादास दानवे यांनी अबू आझमी यांच्यावर कारवाईची मागणी केली. अशातच उपमुख्यमंत्री एकनाथ शिंदे यांनी देशद्रोही पिलावळीला सच्चा मुसलमान देखील माफ करणार नाही, असे म्हणत अबू आझमी यांच्या वक्तव्याविरोधात संताप व्यक्त केला. संभाजी महाराज आणि शिवाजी महाराजांचा अपमाण करणे म्हणजे देशद्रोहीसारखे आहे. म्हणून या देशद्रोह्याला सभागृहात बसण्याचा अधिकार नाही, अशी भूमिका शिंदे यांनी सभागृहात मांडली. दरम्यान या वक्तव्याचे तीव्र पडसाद उमटल्यानंतर आ.अबू आझमी यांनी आपले वक्तव्य मागे घेतले आहे.....