🌟नागपूर दंगलीतील दंगेखोरांची संपत्ती विकून नुकसान भरपाई देणार....!

🌟अशी घोषणा राज्याचे मुख्यमंत्री तथा गृहमंत्री देवेंद्र फडणवीस यांनी आज केली🌟 

नागपूर : नागपूर शहरात हिंदूत्ववादी संघटनांनी औरंगजेब कबर प्रकरणी केलेल्या आंदोलनानंतर उसळलेल्या दंगलीतील नुकसानीची भरपाई दंगल घडवलेल्या दंगेखोरांची संपत्ती विकुन वसूल करण्यात येईल अशी घोषणा राज्याचे मुख्यमंत्री तथा गृहमंत्री देवेंद्र फडणवीस यांनी आज शनिवार दि.२२ मार्च रोजी नागपूरमध्ये प्रसार माध्यमांशी बोलतांना केली.

हिंदूत्ववादी संघटनांनी औरंगजेबाची कबर हटवावी या मागणीसाठी सोमवारी राज्यव्यापी आंदोलन केले होते. या दरम्यान सोमवारी रात्री नागपूरमध्ये मोठी दंगल उसळून आली. या पाश्र्वभूमीवर मुख्यमंत्री देवेंद्र फडणवीस यांनी आज शनिवारी नागपूरमध्ये जावून वरिष्ठ पोलीस अधिकाऱ्यांची बैठक घेतली. या बैठकीनंतर प्रसारमाध्यमांशी संवाद साधताना त्यांनी म्हटले की, पोलिसांनी चार-पाच तासांत दंगल नियंत्रणात आणली. त्यासाठी अश्रूधुराच्या नळकांड्यांचा वापर करण्यात आला. या सगळ्यात अनेक पोलीस कर्मचारी जखमी झाले. यानंतर पोलिसांनी दंगलीचे सीसीटीव्ही फुटेज, लोकांना मोबाईलवर केलेले चित्रीकरण याआधारे दंगेखोरांची ओळख पटवून त्यांच्यावर कारवाई केली आहे. आतापर्यंत १०४ दंगलखोरांची ओळख पटली आहे. त्यापैकी ९२ जणांना अटक केली आहे. तर १२ जण अल्पवयीन असल्याने त्यांच्यावरही विधिसंधर्षित कायद्यानुसार कारवाई सुरु आहे. आणखी काही लोकांना अटक करण्याचा पोलिसांचा मानस आहे. ज्या लोकांची माथीभडकावणारे पॉडकास्ट केले, अफवा पसरवल्या, अशा सर्व लोकांवर कारवाई होईल, अशी माहिती मुख्यमंत्री देवेंद्र फडणवीस यांनी दिली. ज्या लोकांचं नुकसान झाले आहे, गाड्या फुटल्या आहेत, त्यांना येत्या तीन-चार दिवसांत नुकसान भरपाई मिळेल. वातावरण शांत असल्याने घोषित करण्यात आलेल्या संचारबंदीत शिथिलता आणण्याचा प्रयत्न आहे. मात्र, पोलीस पूर्णपणे सजग राहतील. दंगलीत झालेले नुकसानीचे पैसे दंगेखोरांकडून वसूल केले जातील असे देवेंद्र फडणवीस यांनी स्पष्ट केले.

💫नागपूर दंगलीचा पहिला बळी इरफान अंसारीचा उपचारादरम्यान मृत्यू :-

नागपूर : नागपूर मध्ये हिंदुत्ववादी संघटनांनी औरंगजेबाच्या कबरीची प्रतिकात्मक प्रतिमा जाळल्यानंतर सोमवार दि.१७ मार्च २०२५ रोजी उसळलेल्या दंगलीत अनेक जण गंभीर जखमी झाले आहेत या जखमींपैकी इरफान अंसारी या इसमाचा नागपूरमधील मेयो हॉस्पीटलमध्ये उपचारा दरम्यान मृत्यू झाला.

सोमवारी सायंकाळी नागपूरच्या काही भागांमध्ये औरंगजेबच्या कबरीवरुन दंगल उसळली होती. या दंगलीत मोठ्या प्रमाणात जाळपोळ, दगडफेक करण्यात आली होती. या दंगलीत जखमी झालेल्या इरफान अंसारी याच्यावर नागपुरातील मेयो रुग्णालयात उपचार सुरू होते. उपचारा दरम्यान आज त्यांचा मृत्यू झाला. नागपूर दंगल प्रकरणातील अंसारी यांच्या मृत्यूने पहिला बळी गेला आहे. यामुळे मोठी खळबळ उडालीये, हिंसाचारानंतर अनेकजण जखमी असल्याची माहिती मिळतंय. नागपूर हिंसाचार प्रकरणी पोलिसांकडून अजून दोघांना अटक करण्यात आली आहे.......