🌟महाराष्ट्र राज्यातील स्थानिक स्वराज्य संस्थांच्या निवडणूका आगामी एप्रिल महिन्यात होणार ?

 

🌟राज्याचे महसूलमंत्री चंद्रशेखर बावनकुळे यांचे संकेत🌟

कोल्हापूर : राज्यातील स्थानिक स्वराज्य संस्थांच्या निवडणुका ओबीसी आरक्षणाच्या गंभीर प्रश्नांमुळे मागील तीन वर्षांपासून रखडल्या स्थानिक स्वराज्य संस्थांवर मागील तीन वर्षांपासून प्रशासक राज असल्याने याचा फटका सर्वसामान्य नागरिकांना बसत आहे महाराष्ट्रातील स्थानिक स्वराज संस्थांच्या निवडणुकीबाबत सुप्रीम कोर्टात फेब्रुवारी महिन्याच्या शेवटच्या आठवड्यात सुनावणी होणार आहे. या पार्श्वभूमीवर भारतीय जनता पक्षाचे प्रदेशाध्यक्ष तथा राज्याचे महसूलमंत्री चंद्रशेखर बावनकुळे यांनी निवडणुकीसाठी सज्ज राहण्याचे आदेश कार्यकर्त्यांना दिले असून आगामी दोन महिन्यांमध्ये स्थानिक स्वराज्य संस्थाच्या निवडणूका होण्याचे संकेत दिले आहेत त्यामुळे महापालिका निवडणूका एप्रिल मे २०२५ या महिन्यात होण्याची शक्यता वर्तवली जात आहे.

कोल्हापुरातील कसबा बावडा येथील महासैनिक दरबार हॉलमध्ये भाजप पदाधिकाऱ्यांची संघटन पर्व कार्यशाळा पार पडली. यावेळी चंद्रशेखर बावनकुळे यांनी पुढील दोन महिन्यात म्हणजे एप्रिल-मे महिन्यात महापालिका निवडणुका होण्याची शक्यता वर्तवताना पुणे महापालिकेत कमळ फुलवण्यासाठी तयार राहण्याचे आवाहन केले. आगामी स्थानिक स्वराज्य संस्थांच्या पार्श्वभूमीवर भाजप आतापासूनच कामाला लागली आहे. या निवडणुकांच्या पार्श्वभूमीवर पक्ष बळकट करण्यासाठी जास्तीत जास्त सभासद नोंदणी करून घेण्यावर भर देण्यात येत आहे, असेही बावनकुळे म्हणाले.

या मेळाव्याला मंत्री चंद्रशेखर बावनकुळे, मंत्री चंद्रकांत पाटील, मंत्री जयकुमार गोरे, प्रदेश कार्यकारी अध्यक्ष रवींद्र चव्हाण, खासदार धनंजय महाडिक यांच्यासह भाजपचे पदाधिकारी उपस्थित होते....

महायुती महापालिका निवडणुका एकत्र लढणार - बावनकुळे

स्थानिक स्वराज्य संस्थांच्या निवडणुका महायुती युती म्हणून एकत्र लढवेल. परंतु स्थानिक परिस्थितीचा विचार करून काही निर्णय घेतले जातील, असेही बावनकुळे यांनी स्पष्ट केले. या विधानामुळे भाजप अप्रत्यक्षपणे या निवडणुका स्वबळावर लढण्याची शक्यता वर्तवली जात आहे. आतापर्यंत राज्यात भाजपचे १ कोटी १२ लाख प्राथमिक सदस्य तयार झाले आहेत. २८ फेब्रुवारीपर्यंत १.५ कोटी सदस्य होण्याचे लक्ष्य ठेवले आहे, असेही त्यांनी सांगितले.