🌟राज्याचे उपमुख्यमंत्री एकनाथ शिंदे यांना जिवे मारण्याच्या धमकी प्रकरणी मुंबई पोलिसांनी दोघांना घेतले ताब्यात....!

 

🌟मुंबई पोलीसांनी बुलढाण्यातून अभय शिंगणे,मंगेश वायाळ या दोन आरोपींना घेतले ताब्यात🌟

मुंबई :- महाराष्ट्र राज्याचे उपमुख्यमंत्री तथा शिवसेना राष्ट्रीय नेते एकनाथ शिंदे यांच्यासह त्यांच्या गाडीला बॉम्बने उडवून देण्याची ई-मेल द्वारे धमकी देणाऱ्या दोन आरोपींना मुंबई पोलीसांनी बुलढाण्यातून ताब्यात घेतलयाने खळबळ माजली असून संबंधित आरोपींनी उपमुख्यमंत्री शिंदे यांना ई-मेलद्वारे बॉम्बने उडवून देण्याची धमकी नेमक्या कोणत्या कारणासाठी दिली यांचे कारण अद्यापही स्पष्ट झाले नसले तरी मुंबई पोलीसांनी हे प्रकरण अत्यंत गांभिर्याने घेतल्यामुळे अवघ्या काही तासात संशयीत आरोपींच्या मुसक्या आवळण्यात यश मिळाले आहे.

शिवसेना नेते तथा राज्याचे उपमुख्यमंत्री एकनाथ शिंदे हे काल दिल्ली दौऱ्यावर असतांना मुंबईतील मंत्रालय गोरेगावसह अन्य पोलीस स्थानकात ना. शिंदे यांना त्यांच्या वाहनासह बॉम्बने उडवून देण्याची धमकी देणारा ई-मेल प्राप्त झाला होता. यानंतर एकच खळबळ उडाली होती. मुंबई पोलीसांनी सतर्कता बाळगत वायु वेगाने तपास सुरु केला. या तपासात सदर ई-मेल बुलढाण्यातून आल्याचे स्पष्ट झाले. या प्रकरणी अभय शिंगणे (वय २२), मंगेश वायाळ (वय ३५) मुंबई पोलीसांच्या गुन्हे शाखेने बुलढाण्यातून ताब्यात घेतले आहे. या दोघांनी धमकी नेमकी का दिली आणि त्यांचा उद्देश काय होता, याचा तपास पोलिस करत आहेत......