🌟परभणी शहरातील साखला प्लॉट भागातील सराईत आरोपी ताडीवाला एमपीडीए अंतर्गत स्थानबध्द...!

🌟राज्य उत्पादन शुल्क विभागाने दाखल केलेल्या प्रस्तावाला जिल्हाधिकारी रघुनाथ गावडे यांनी दिली मान्यता🌟 

परभणी (दि.१३ फेब्रुवारी २०२५) : परभणी शहरातील साखला प्लॉट भागातील सराईत आरोपी ताडीवाला अशोक मारोतराव शिंदे याला एमपीडीए कायद्यांतर्गत जिल्हा मध्यवर्ती कारागृह छत्रपती संभाजीनगर येथे स्थानबध्द करण्यात आले आहे आरोपीवर कारवाईसाठी राज्य उत्पादन शुल्क विभागाने दाखल केलेल्या प्रस्तावाला जिल्हाधिकारी रघुनाथ गावडे यांनी मान्यता दिली आहे.

            राज्य उत्पादन शुल्क अधीक्षक गणेश पाटील यांच्या मार्गदर्शनाखाली दुय्यम निरीक्षक ए.एम. पठाण यांनी एमपीडीए कायद्यांतर्गत कारवाई करण्यासाठी जिल्हाधिकारी रघुनाथ गावडे यांच्याकडे प्रस्ताव सादर केला. सराईत आरोपी ताडीवाला अशोक मारोतराव शिंदे हा त्याच्या राहत्या घरी बेकायदेशीररित्या विषारी ताडी निर्मिती करत होता. त्याच्यावर राज्य उत्पादन शुल्क विभागाने अनेकदा गुन्हे दाखल केले आहेत. संबंधिताकडून चांगल्या वर्तवणुकीचे बंधपत्र देखील घेतले होते. मात्र त्याचे गुन्हेगारी कृत्य कमी होत नव्हते म्हणून त्याच्यावर एमपीडीए अंतर्गत कारवाई करावी या बाबत दुय्यम निरीक्षक ए. एम. पठाण यानी आधीक्षक गणेश पाटील यांच्यामार्फत जिल्हाधिकार्‍यांकडे प्रस्ताव सादर केला. या प्रस्तावाला मंजुरी मिळाली असून अशोक शिंदे याला छत्रपती संभाजी नगर येथील जिल्हा मध्यवर्ती कारागृहात स्थानबध्द करण्यात आले आहे.

           दरम्यान, एमपीडीए म्हणजे महाराष्ट्र झोपडपट्टीधारक, दारू विक्रेते, अंमली पदार्थ गुन्हेगार आणि धोकादायक व्यक्तींच्या धोकादायक कारवाया प्रतिबंधक कायदा, 1981. हा कायदा, धोकादायक व्यक्तींविरुद्ध कारवाई करण्यासाठी करण्यात आला आहे.  एमपीडीए कायद्याची वैशिष्ट्ये म्हणजे या कायद्यानुसार, आरोपीला एका वर्षासाठी तत्काळ स्थानबद्ध (तुरूंगवास) करण्यात येते.  या कायद्याविरोधात केवळ उच्च न्यायालय व मंत्रालयात दाद मागता येते. हा कायदा जिल्हा दंडाधिकारी आणि पोलिस आयुक्तांना त्यातील तरतुदींचा वापर करण्याचे अधिकार देतो. या कायद्याचा वापर वाळू तस्कर आणि काळाबाजारीविरुद्धही केला जातो.  या कायद्यामुळे, झोपडपट्टीधारक, दारू विक्रेते, अंमली पदार्थ गुन्हेगार आणि धोकादायक व्यक्तींच्या धोकादायक कारवायांना आळा घालण्यात मदत होते.