🌟महाराष्ट्र राज्यातील ओबीसी/एसईबीसी विद्यार्थ्यांना दिलासा.....!

 

🌟जात वैधता प्रमाणपत्र सादर करण्यास राज्य सामाईक प्रवेश परीक्षा कक्षाने (सीईटी कक्ष) ६ एप्रिल पर्यंत मुदत🌟

मुंबई : सामाजिक व आर्थिकदृष्ट्या दुर्बल घटक (एसईबीसी) आणि मागास प्रवर्गातून (ओबीसी) शैक्षणिक वर्ष २०२४-२०२५ मध्ये विविध व्यावसायिक अभ्यासक्रमांना प्रवेश घेतलेल्या विद्यार्थ्यांना जात वैधता प्रमाणपत्र सादर करण्यास राज्य सामाईक प्रवेश परीक्षा कक्षाने (सीईटी कक्ष) ६ एप्रिल २०२५ पर्यंत मुदत दिली आहे. यामुळे जात प्रमाणपत्रासाठी सादर केलेल्या अर्जाच्या पावतीच्या आधारावर प्रवेश घेतलेल्या विद्यार्थ्यांना दिलासा मिळाला आहे. तर शैक्षणिक वर्ष २०२५-२६ साठी एसईबीसी आणि ओबीसी प्रवर्गातून अर्ज करणाऱ्या विद्यार्थ्यांना ही सवलत मिळणार नसल्याचे, सीईटी कक्षाने स्पष्ट केले आहे.

शैक्षणिक वर्ष २०२४-२५ मध्ये विविध व्यावसायिक अभ्यासक्रमांना एसईबीसी आणि ओबीसी प्रवर्गातून प्रवेश घेतलेल्या अनेक विद्यार्थ्यांनी जात वैधता प्रमाणपत्रासाठी सादर केलेल्या अर्जाच्या पावतीवर प्रवेश घेतले. या विद्यार्थ्यांना जात वैधता प्रमाणपत्र सादर करण्यासाठी सहा महिन्यांची मुदत दिली होती. पावतीच्या आधारे ज्या विद्यार्थ्यांनी प्रवेश घेतला, त्यातील काही विद्यार्थ्यांनी विहीत कालावधीत जात वैधता प्रमाणपत्र सादर केले. तर अनेकांना जात वैधता प्रमाणपत्र सादर करणे शक्य झाले नाही. अशा विद्यार्थ्यांना दिलासा देण्यासाठी सीईटी कक्षाने ६ एप्रिल २०२५ पर्यंत जात वैधता प्रमाणपत्र सादर करण्याची मुभा दिली आहे.

अद्यापपर्यंत जात वैधता प्रमाणपत्र प्राप्त न केलेल्या विद्यार्थ्यांनी ऑनलाईन सीईटी कक्षाच्या संकेतस्थळावर अपलोड करावे. तसेच संबंधित संस्था किंवा महाविद्यालयात जमा करावे, अशी सूचना सीईटी कक्षाने केली आहे.....