🌟संत तुकाराम महाराज यांचे ११ वे वंशज शिरीष महाराज मोरे यांची गळफास लावून आत्महत्या....!

🌟आर्थिक विवंचनेतून आत्महत्या केल्याचा प्राथमिक अंदाज पोलिसांनी केला व्यक्त🌟

पुणे : जगतगुरु संतश्रेष्ठ तुकाराम महाराजा यांच्या घराण्यातील ११ वे वंशज संत शिरीष महाराज मोरे यांनी देहू येथे काल बुधवार दि.०५ फेब्रुवारी २०२५ रोजी सकाळच्या सुमारास स्वतःच्या राहत्या घरातच गळफास लावून आत्महत्या केलयाची हृदयविदारक घटना घडली शिरीष महाराज मोरे यांनी आर्थिक विवंचनेतून आत्महत्या केल्याचा अंदाज व्यक्त केला जात असून यामुळे देहू गावावर शोककळा पसरली आहे.

💫आर्थिक विवंचनेतून आत्महत्या केल्याचा अंदाज :-

पोलिसांनी दिलेल्या माहितीनुसार, शिरीष महाराज यांनी बुधवार दि.०५ फेब्रुवारी रोजी सकाळी अंदाजे ०८.३० वाजेच्या सुमारास आपल्या राहत्या घरी उपरण्याने गळफास घेऊन आत्महत्या केली आहे. आर्थिक विवंचनेतून ही आत्महत्या झाल्याचा प्राथमिक अंदाज पोलिसांनी व्यक्त केला आहे येणाऱ्या २० फेब्रुवारी २०२५ रोजी त्यांचा विवाह होणार होता. शिरीष महाराज यांनी आत्महत्येपूर्वी चिठ्ठी लिहून ठेवली आहे. त्यात त्यांनी आर्थिक विवंचनेतून आत्महत्या करत असल्याचा उल्लेख केला आहे. त्यांच्या पश्चात आई आणि वडील असा परिवार आहे.

शिरीष महाराज मोरे यांनी नवीन घर बांधले होते. खालच्या मजल्यावर आई-वडील आणि वरच्या मजल्यावर ते राहत होते मंगळवारी रात्री शिरीष महाराज मोरे वरील खोलीत आराम करण्यासाठी गेले होते. सकाळी साडेआठ वाजल्यानंतरही ते खाली आले नाहीत. त्यामुळे घरातील सदस्य वरती गेले. दरवाजा वाजविला पण दार उघडले जात नव्हते. आतून प्रतिसाद मिळत नव्हता. त्यामुळे दार तोडण्यात आले असता मोरे यांनी पंख्याच्या हुकाला उपरण्याने गळफास घेऊन आत्महत्या केल्याचे निदर्शनास आले.

आत्महत्या करण्यापूर्वी त्यांनी चिठ्ठी लिहून ठेवली आहे. दरम्यान, आर्थिक विवंचेनेतून त्यांनी आत्महत्या केल्याचे देहूरोड पोलीस ठाण्याचे वरिष्ठ पोलीस निरीक्षक विक्रम बनसोडे यांनी सांगितले. अधिक तपास देहू रोड पोलीस करीत आहेत. दरम्यान, शिरीष मोरे महाराज यांच्या पार्थिवावर बुधवारी दुपारी चार वाजेच्या सुमारास वैकुंठ स्मशानभूमी येथे अंत्यसंस्कार करण्यात आले......