🌟संवेदनशील समाजातील सक्षम लोक एका रुग्णवाहिकेची सोय करू शकत नाही का ?

🌟लोकशाहीतील संवैधानिक हक्कांसाठी निघालेल्या लाँग मार्चची नोंद घेऊन त्यांच्या मागण्या मान्य करणे अपेक्षित🌟

परभणी ते मंत्रालय असा दीर्घ अंतराचा आणि अनेक दिवस चालणारा लाँग मार्च गेल्या नऊ दिवसांपासून अविरत सुरू आहे. त्यातील अनेक भीमसैनिक, माता, भगिनी ह्या पायपीटीने त्रस्त होऊन पायाला जखमा होऊन आजारी पडत असतांनादेखील ताठ कण्याने न्याय मिळवण्यासाठी मंत्रालयाकडे कूच करीत आहेत. त्यातील एक नेते सुधीर साळवे  हे जालना जिल्ह्यात दाखल झालेल्या लाँग मार्च मध्ये रस्त्यावर चक्कर येऊन पडले. त्यांना रुग्णालयात दाखल केले असताना, त्यांच्या तळपायाला अक्षरशः जखमा होऊन त्याचे गाठीत रूपांतर झाल्याचे उपचारात निष्पन्न झाले. त्यांना डॉक्टरांनी आराम करण्याचा सल्ला दिला तरी देखील हा बहादूर भीम सैनिक माघार घ्यायला तयार नाही. त्याने डॉक्टरांना स्पष्ट सांगितले की, माझा जीव गेला तरी मी लाँग मार्च मधून माघार घेणार नाही. काय ही जिगर! केव्हढी प्रचंड आंबेडकरी निष्ठा! आताच्या मतलबी आणि चमकोगिरीच्या काळात ही अनन्य साधारण निष्ठा आहे. असे मी म्हंटल्यास वावगे ठरू नये. हा इतका जिवाचा आटापिटा कशासाठी ?

                   दहा डिसेंबर रोजी परभणी शहरातील भारतरत्न डॉ. बाबासाहेब आंबेडकरांच्या पुतळ्यासमोरिल संविधानाची प्रतिकृती  असलेल्या काचेच्या बॉक्सवर सोपान पवार ह्या मूर्ख माणसाने दगड फेकून विटंबना केली .त्यामुळे आंबेडकरी समाजामध्ये संतापाची लाट उसळली. नंतरच्या काळात समाजकंटकांनी जाळपोळ करीत दंगल घडवून आणली. त्यामुळे पोलिसांच्या कोंबिंग ऑपरेशन मध्ये कित्येक निरपराध आंबेडकरी नागरीकांना मारझोड करून पोलीस कोठडीत डांबण्यात आले. त्यापैकी एक  सोमनाथ सूर्यवंशी ह्या एल. एल. बी. च्या तिसर्‍या वर्षी    शिकत  असलेल्या विद्यार्थ्याला काहीही संबंध नसताना पोलिसांनी अटक केली. तिथे त्याला अमानुष मारहाण करण्यात आली. त्यात त्याचा करूण  अंत झाला. हा पोलिसी अत्याचार सहन न झाल्यामुळे आंदोलनातील आंबेडकरी नेते विजय वाकोडे ह्यांचे हृदय विकाराच्या तीव्र झटक्याने निधन झाले. त्यांच्या बलिदानाला न्याय मिळावा यासाठी सातत्याने आंदोलन सुरू आहे. दरम्यानच्या काळात सूर्यवंशीच्या कुटुंबियांनी सरकारी मदत नाकारून त्याच्या बलिदानाला न्याय मिळावा अशी मागणी केली. जिल्हा पातळीवर न्याय मिळत नसल्याचे पाहून आंबेडकरी समाजाने दिनांक 17/01/2025 पासून परभणी ते मंत्रालय असा लाँग काढला. गेले नऊ  दिवस बहादूर भीमसैनिक 

थंडीवाऱ्याची पर्वा न करता अविरत मंत्रालयाच्या दिशेने वाटचाल करीत आहेत. आंबेडकरी समाज उत्स्फूर्तपणे त्यात सहभागी होत असून दिवसेंदिवस लाँग मार्च मध्ये भीम सैनिकांची संख्या लक्षणीय वाढत आहे. तसेच त्यांची खाण्यापिण्याची सोय देखील केली जात आहे. वास्तविक पाहता ह्या संवैधानिक देशातील राज्य सरकारने लोकशाही मुल्य लक्षात घेऊन, लोकशाहीतील संवैधानिक हक्कांसाठी निघालेल्या लाँग मार्चची 

नोंद घेऊन त्यांच्या मागण्या मान्य करणे अपेक्षित आहे. परंतु तसे करण्याची त्यांची इच्छाशक्ती नसेल तर, ह्या देशातील नागरिकांचा मूलभूत हक्क लक्षात घेऊन, त्यांच्या वैद्यकीय मदतीसाठी किमान एक तरी सुसज्ज रुग्णवाहिका तैनात करणे अपेक्षित आहे.  परंतु आतापर्यंत तसे  झाले नाही. अजून ही वेळ गेलेली नाही, ह्या लेखाद्वारे मी राज्य सरकारला विनंती करतो की, त्यांनी ताबडतोब ह्याची दखल घेऊन रुग्णवाहिकेची सोय करावी. अन्यथा त्यांना आंबेडकरी समाजाच्या रोषाला सामोरे जावे लागेल.  परभणी ते मंत्रालय हा खुप दूरचा पल्ला आहे. त्यामुळे मानवी  शरीराच्या मर्यादेपलीकडे सातत्याने चालणे झाल्यास त्याचा दुष्परिणाम होणे साहजिक आहे. काही लोकांच्या मनात असा ही प्रश्न उपस्थित होण्याची शक्यता आहे की, वारकरी नाही का आळंदी ते पंढरपूर वारी काढतात? परंतु वारी ही नियोजनबद्ध असते. त्यांच्या बरोबर डॉक्टरांचा ताफा  सर्व आवश्यक उपचारांच्या तरतुदीसह दिमतीला असतो. त्याच बरोबर  ज्या गावामध्ये त्यांचा मुक्काम असतो, तिथे त्यांची सर्व सोय केली जातेच परंतु त्याच बरोबर वारीत सामील असलेल्या वारकर्‍यांच्या पायांची मालीश   करण्यासाठी मोठ्या संख्येने  लोक तत्पर असतात. अशा प्रकारची सोय   आपल्या लाँग मार्च मध्ये नाही. म्हणुन मला असे वाटते की, सरकार रुग्णवाहिकेची तरतूद करेल की नाही? अशी शंका गृहीत धरून कर्तव्याच्या भूमिकेतून आपला संवेदनशील समाज कामाला लागणे आवश्यक आहे. आपल्यातील  समाज धुरिणांनी आवाहन केल्यास  रुग्णवाहिककेची सोय करणे सहज शक्य आहे. परंतु वेळ अतिशय कमी आहे म्हणुन मी समाजातील निधी बाळगून असलेल्या सामाजिक संस्था,  मागासवर्गीय उद्योजकांची संघटना, आणि समाजातील श्रीमंत वर्ग, आमदार,  खासदार,  नगरसेवक,   ह्यांना नम्र आवाहन करतो की, त्यांनी ह्याकामी पुढाकार घेतला तर लाँग मार्चच्या सोबतीला रुग्णवाहिकेची तरतूद करणे सहज शक्य होईल. ह्यातून समाजापुढे एक चांगला संदेश जाईल. 

             मला खात्री आहे की, माझा संवेदनशील समाज ह्या कर्तव्याची लवकरात लवकर पूर्तता करेल......

जयभीम. 

अरुण निकम. 

9323249487.

दिनांक...26 जानेवारी 2025.