🌟चीनमध्ये मानवी मेटान्यूमो व्हायरसचा (एचएमपीव्ही) उद्रेक : नागरीकांनी दक्षता बाळगावी....!

🌟आरोग्य विभागातर्फे एचएमपीव्हीबाबत देण्यात येणाऱ्या सूचनांचे काटेकोरपणे पालन करावे🌟

 मुंबई (दि.०८ जानेवारी २०२४) - चीनमध्ये मानवी मेटान्यूमो व्हायरसचा (एचएमपीव्ही) उद्रेक झाल्याच्या पार्श्वभूमीवर नागरीकांनी दक्षता बाळगावी, तसेच आरोग्य विभागातर्फे एचएमपीव्हीबाबत देण्यात येणाऱ्या सूचनांचे काटेकोरपणे पालन करावे, असे आवाहन आरोग्य विभागाने केले आहे.

मानवी मेटान्यूमो व्हायरस (एचएमपीव्ही) तीव्र श्वसन संसर्गाचे एक प्रमुख कारण आहे. हा विषाणू सर्वप्रथम नेदरलॅंडमध्ये 2001 मध्ये आढळला. मानवी मेटान्यूमोव्हायरस हा एक सामान्य श्वसन विषाणू आहे. या विषाणूमुळे श्वसनमार्गाच्या वरील भागातील संसर्ग (सर्दीसारख्या) आजारास कारणीभूत ठरते. हा एक हंगामी रोग आहे, जो सामान्यत: आरएसव्ही आणि फ्लूप्रमाणेच हिवाळा आणि उन्हाळ्याच्या सुरुवातीला उद्भवतो. याबाबत डीजीएचएस आणि संचालक, एनसीडीसी, दिल्ली यांनी दि. 3 जानेवारी 2025 रोजी एक निवेदन प्रसिद्ध केले आहे.

या पार्श्वभुमीवर सार्वजनिक आरोग्य विभागाने राज्यातील श्वसनाच्या संसर्गाच्या आकडेवारीचे विश्लेषण केले आहे. वर्ष 2023च्या तुलनेत डिसेंबर 2024 मध्ये कोणतीही वाढ झाली नाही. तथापि खबरदारीचा एक भाग म्हणून नागरिकांनी श्वसनाच्या संसर्गापासून बचाव करण्यासाठी काय करावे आणि काय करू नये, या संदर्भातील सूचनांचे पालन करण्याचे आवाहन आरोग्य विभागाने केले आहे.

हे करा – जेव्हा आपल्याला खोकला किंवा शिंका येत असल्यास तोंड आणि नाक रुमाल किंवा टिश्यू पेपरने झाकावे. साबण आणि पाणी किंवा अल्कोहोल आधारित सॅनिटायझरने हात वारंवार धुवावे. ताप, खोकला आणि शिंका येत असल्यास सार्वजनिक ठिकाणापासून दूर राहावे. भरपूर पाणी प्यावे आणि पौष्टिक अन्न खावे. संक्रमण कमी करण्यासाठी सर्व ठिकाणी पुरेसे वायुविजन (व्हेंटीलेशन) होईल, याची दक्षता घ्यावी. 

हे करु नये -  हस्तांदोलन करू नये. टिश्यू पेपर आणि रुमालाचा पुनर्वापर करावा टाळावा. आजारी लोकांशी जवळचा संपर्क टाळावा, डोळे, नाक आणि तोंडाला वारंवार स्पर्श करू नये. सार्वजनिक ठिकाणी थुंकु नये, डॉक्टरांच्या सल्ल्याशिवाय औषधे घेणे टाळावे.चीनमधून आलेला नवीन विषाणू मानवी मेटान्यूमो व्हायरसबाबत चिंतेचे कारण नाही. याबाबत आवश्यक दक्षता घेण्यात येत आहे. नागरिकांनी नाहक भितीचे वातावरण निर्माण करण्याची गरज नाही. तथापि नागरिकांनी पुरेशी दक्षता घ्यावी व आरोग्य विभागाने सूचित केलेल्या नियमांची पालन करावे........