🌟देशात कुठेही रस्ते अपघात झाल्यास अपघातातील जखमींना मिळणार कॅशलेस उपचार - केंद्रीय मंत्री नितीन गडकरी

 

🌟सदरील योजना कोणत्याही श्रेणीतील रस्त्यावर मोटार वाहनांच्या वापरामुळे होणाऱ्या सर्व अपघातांना लागू होईल🌟

नवी दिल्ली : रस्ते अपघातात जखमी झालेल्यांसाठी केंद्र सरकारकडून 'कॅशलेस ट्रीटमेंट' योजना जाहीर करण्यात आली आहे. या योजनेंतर्गत देशात कुठेही अपघातात जखमी झालेल्यांना उपचाराकरिता केंद्र सरकारकडून दीड लाख रुपये दिले जाणार आहेत किंवा जखमींचा सात दिवसांच्या उपचाराचा खर्च आता केंद्र सरकार उचलणार आहे अशी माहिती केंद्रीय रस्ते वाहतूक मंत्री नितीन गडकरी यांनी दिली.

दिल्लीतील भारत मंडपममध्ये सर्व राज्यांच्या परिवहन मंत्र्यांची बैठक आयोजित करण्यात आली होती. या बैठकीत गडकरी म्हणाले की, "ही योजना कोणत्याही श्रेणीतील रस्त्यावर मोटार वाहनांच्या वापरामुळे होणाऱ्या सर्व अपघातांना लागू होईल. अपघातानंतर २४ तासांच्या आत पोलिसांना माहिती दिल्यास, पीडितेच्या उपचाराचा खर्च केंद्र सरकार उचलेल. यासोबतच सरकारने 'हिट अँड रन' प्रकरणातील पीडितांच्या कुटुंबीयांना २ लाख रुपयांची भरपाई जाहीर केली आहे. कॅशलेस उपचार योजना राष्ट्रीय आरोग्य प्राधिकरण, रुग्णालये, पोलीस आणि आरोग्य संस्था यांच्या समन्वयाने अंमलबजावणी करणाऱ्या एजन्सीद्वारे चालविली जाईल."

रस्ते सुरक्षा ही आपल्या सरकारची प्राथमिकता आहे. शाळा आणि महाविद्यालयासमोर वाहतूक नियोजन नसल्याने दरवर्षी जवळपास १० हजार विद्यार्थ्यांचा मृत्यू होतो, असेही त्यांनी सांगितले. तसेच विद्यार्थ्यांना शाळेत सोडणाऱ्या स्कूल बसचालकांसाठीही आम्ही नवे नियम केले आहेत, असे ते म्हणाले.१४ मार्च २०२४ रोजी पायलट प्रोजेक्टअंतर्गत, रस्ते वाहतूक आणि महामार्ग मंत्रालयाने 'कॅशलेस उपचार योजना' प्रथम चंदिगड आणि नंतर सहा राज्यांमध्ये विस्तारित केली होती. रस्ते अपघातात बळी पडलेल्यांना वेळेवर उपचाराची सुविधा मिळावी, यासाठी सुरू करण्यात आलेली ही योजना आता मार्च महिन्यात संपूर्ण भारतात लागू होणार आहे.

गेल्यावर्षी १.८० लाख लोकांचा अपघातात मृत्यू

देशामध्ये रस्ते अपघातामधील मृत्यूची आणि जखमींची आकडेवारी चिंताजनक आहे. २०२४ मध्ये सुमारे १.८० लाख लोकांचा रस्ते अपघातात मृत्यू झाला. त्यापैकी ३० हजार मृत्यू हेल्मेट न घातल्याने झाले आहेत. तसेच त्यापैकी ३५ हजार मृत्यू हे वैध परवान्याशिवाय वाहन चालवणाऱ्या चालकांमुळे झाले आहेत. तसेच गंभीर बाब म्हणजे ६६ टक्के अपघात हे १८ ते ३४ वयोगटातील लोकांचे झाले आहेत, अशी आकडेवारीही गडकरी यांनी सांगितली......