🌟एसआयटी,सीआयडीसह न्यायालयीन समितीच्या तपासात वस्तुस्थिती समोर आल्यावरच धनंजय मुंडेंचा निर्णय....!

 

🌟खालचे कार्यकर्ते म्हणत आमदार सुरेश धस यांना अजित पवारांनी फटकारले🌟

बिड :- बिड जिल्ह्यातल्या केज तालुक्यातील मस्साजोग येथील सरपंच संतोष देशमुख हत्या प्रकरणामध्ये अन्न व पुरवठा मंत्री धनंजय मुंडे यांनी राजीनामा द्यावा यासाठी आ. सुरेश धस आणि अंजली दमानिया या सातत्याने पाठपुरावा करत आहे. दोन दिवसापुर्वीच अंजली दमानिया यांनी कागदपत्रासह उपमुख्यमंत्री अजित पवार यांची भेट घेतली. त्यानंतर अजित पवारांनी प्रसार माध्यमांशी संवाद साधला. या प्रकरणात एसआयटी, सीआयडी याच्यासह न्यायालयीन समिती तपास करत आहेत. तपासानंतर वस्तुस्थिती समोर आल्यानंतर जो कोणी दोषी असेल त्यांच्यावर नक्कीच कारवाई होईल. धनंजय मुंडेंच्या राजीनाम्याचा प्रश्नच नाही. कोण काय बोलतं आणि काय आरोप करतात. याच्याशी मला देणे घेणे नाही. महायुतीमध्ये वरिष्ठ पातळीवरील नेते या प्रकरणावर लक्ष ठेवून आहेत. स्वतःमुख्यमंत्री फडणवीस, उपमुख्यमंत्री एकनाथ शिंदे आणि मी स्वतः आम्ही तिघांनीही या प्रकरणाची वस्तुस्थिती समोर आल्यानंतर काय निर्णय घ्यायचा यावर चर्चा केली आहे. त्यामुळे खालचे कार्यकर्ते काय बोलतात, याचे आपल्याला देणे घेणे नसल्याचे सांगत अप्रत्यक्षपणे अजित पवार यांनी सुरेश धस यांनाच फटकारले आहे.

राज्याचे उपमुख्यमंत्री अजित पवार यांनी मंगळवारी (ता. २८) मीडियाशी संवाद साधला. यावेळी त्यांनी अंजली दमानिया, सुरेश धस आणि धनंजय मुंडेंच्या राजीनाम्यावर भाष्य केलं. ते म्हणाले, बीडमधील मस्साजोगचे दिवंगत सरपंच संतोष देशमुख हत्येप्रकरणी सीआयडी, एसआयटी, न्यायालयीन अशा चौकशा सुरू आहेत. अंजली दमानिया यांनी जी कागदपत्रे दिली. ती सीआयडी आणि एसआयटीकडे दिली आहेत. कुणी पुरावे दिले तर त्याची शहानिशा करावी लागते, म्हणून ते सीआयडी आणि एसआयटीकडे देण्यात आले आहेत. जी वस्तुस्थिती समोर येईल त्यानुसार पुढच्या गोष्टी काय करायच्या ते ठरवलं जाईल.मुख्यमंत्री आणि दोन उपमुख्यमंत्र्यांनी पण यापूर्वी सांगितलं आहे. ज्याप्रकारे बीड जिल्ह्यातील सरपंच संतोष देशमुखांच्या बाबतीत घडलं आहे, त्याच्या चौकशा सुरू आहेत. आणि या चौकशीत जे कुणी दोषी असतील, त्यांना फाशीची शिक्षा झाली पाहिजे असा प्रयत्न आम्ही करतोय. जी काही चौकशी चालू आहे, त्याच्यात आणखी कुणाची नावं आली तर त्यांच्यावरही कारवाई करण्यात येईल. परंतु, जर कुणाचा त्या प्रकरणाशी काहीही संबंधच नसेल तर कारवाई करण्याचा प्रश्नच येत नाही, असं अजित पवारांनी सांगितलं.

पण ज्या क्रूर पध्दतीनं सरपंचाची हत्या झालेली आहे. ही घटना माणुसकीला काळिमा फासणारी आहे. तसेच त्यांचं कुणीही समर्थन करु शकत नाही. त्यामुळे ज्यांनी कुणी हे दृष्कृत्य केले आहे. त्यांना फासावर लटकवण्यासाठी आमचं सरकार कटिबध्द आहे, असा पुनरुच्चारही उपमुख्यमंत्री अजित पवार यांनी यावेळी केला.

💫माझ्या राजीनाम्याबद्दल मुख्यमंत्री फडणवीस आणि अजितदादा निर्णय घेतील :-

बीड प्रकरणात धनंजय मुंडे यांच्या राजीनाम्यासाठी दबाव वाढला असून अंजली दमानिया यांनी काल उपमुख्यमंत्री अजित पवार यांची भेट घेतली. आता धनंजय मुंडे यांनी याबाबत स्पष्टीकरण दिले आहे. मंत्रालयात बैठकीसाठी आले असता त्यांनी माध्यमांशी संवाद साधला. धनंजय मुंडे म्हणाले की, अंजली दमानिया या अजित पवारांना भेटल्या आहेत, त्यांनी कागदपत्रे दिली आहेत, मात्र माझ्या राजीनाम्याची अजून कोणी मागणी केलेली नाही. धनंजय मुंडे म्हणाले की, राजीनाम्यावर मी काही बोलणार नाही, यावर मुख्यमंत्री देवेंद्र फडणवीस आणि उपमुख्यमंत्री अजित पवार उत्तर देतील, त्यांनीच उत्तर द्यावे अशी माझी सुद्धा इच्छा आहे. दरम्यान माध्यमांशी संवाद साधल्यानंतर धनजय मुंडे यांनी मंत्रालयात मुख्यमंत्री देवेंद्र फडणवीस यांची भेट घेतली आहे. परळीतील राखेच्या अर्थकारणावरुन धनंजय मुंडे यांनी स्पष्टीकरण दिले की या संदर्भात सुप्रीम कोर्टाचा २०२६ चा जर जीआर पाहिला तर त्यात असे म्हटले आहे की, थर्मल पावरची राख ही कचरा आहे आणि तो त्यांनी स्वतः पैसे खर्च करुन उचलला पाहिजे. महानिर्मिती हे सरकारशी संबंधित नाही त्यामुळे या प्रॉफिट ऑफ बिझनेस असं कुठे येत नाही. असंही धनंजय मुंडे यांनी यावेळी सांगितले......