🌟हिंगोली जिल्ह्याचे नवीन पालकमंत्री म्हणून नरहरी झिरवळ यांची नियुक्ती....!

🌟अनुभवी नेतृत्वाचा जिल्ह्याच्या विकासाला फायदा होईल अशी हिंगोली जिल्हा वासियांना अपेक्षा🌟

✍️शिवशंकर निरगुडे (हिंगोली)

हिंगोली : राज्यातील पालकमंत्री पदाची यादी जाहीर शनिवारी करण्यात आली असून हिंगोलीच्या पालकमंत्री पदी अन्न व औषध प्रशासन मंत्री नरहरी झिरवळ यांची नियुक्ती करण्यात आली आहे. त्यामुळे जिल्ह्याचा पालकमंत्री कोण होणार याची प्रतीक्षा संपली आहे. निवडणुकीत विधानसभा जिल्ह्यातील तिन्ही मतदारसंघातून महायुतीचे उमेदवार निवडून आले आहेत. मंत्रीमंडळ विस्तारात हिंगोली जिल्ह्याला एकही मंत्रीपद मिळाले नाही. त्यामुळे हिंगोली जिल्ह्याच्या पालकमंत्रीपदी कोणाची नियुक्ती होणार ? याकडे जिल्हावासियांचे लक्ष लागले होते.

पालकमंत्री पदावरून तर्कवितर्कही लागले होते. अखेर १८ जानेवारी रोजी राज्यातील पालकमंत्री पदाची यादी जाहीर करण्यात आली. यात हिंगोलीच्या पालकमंत्रीपदी अन्न व औषध प्रशासन मंत्री नरहरी झिरवळ यांची नियुक्ती करण्यात आली. नरहरी झिरवळ हे दिंडोरीचे आमदार असून त्यांनी सरपंच ते विधानसभेचे उपाध्यक्ष अशी मजल मारली आहे. दिंडोरी विधानसभा मतदारसंघातून सलग चार वेळा निवडून आले. त्यामुळे अनुभवी नेतृत्वाचा जिल्ह्याच्या विकासाला फायदा होईल, अशी अपेक्षा आहे.....