🌟विधानसभा निवडणुकीत पराभव झालेली महाविकास आघाडी विधानसभा निवडणूक निकालाविरुद्ध याचिका दाखल करणार.....!

🌟काँग्रेसचे नेते व ज्येष्ठ विधीज्ञ अभिषेक मनुसिंघवी यांनी यासाठी सकारात्मक प्रतिसाद दिल्याची माहिती🌟

विधानसभा निवडणुकीतील पराभूत झालेल्या  महाविकास आघाडीच्या उमेदवारांनी निवडणूक निकालाविरोधात याचिका दाखल करण्याचा निर्णय घेतला आहे. सर्वोच्च न्यायालयात सदर याचिका शुक्रवारी किंवा सोमवारी दाखल होणार आहे. काँग्रेसचे नेते व ज्येष्ठ विधीज्ञ अभिषेक मनुसिंघवी यांनी यासाठी सकारात्मक प्रतिसाद दिल्याची माहिती मिळाली आहे.

ज्येष्ठ नेते शरद पवार यांच्या दिल्लीतील निवासस्थानी महाराष्ट्रातील मविआचे पराभूत उमेदवार व जेष्ठ  विधीज्ञ अभिषेक मनु सिंघवी यांच्यात मंगळवारी रात्री चर्चा झाली. काँग्रेसचे नेते बाळासाहेब थोरात यांनी ही माहिती दिली.  मविआचे अनेक पराभूत उमेदवार या बैठकीला उपस्थित होते.अभिषेक मनु सिंघवी यांनी सर्वांचे मुद्दे ऐकून घेतले. ईव्हीएमबद्दलच्या आक्षेपांवर त्यांनी विस्ताराने चर्चा केली. आयोगाने सांगितलेले सर्व शुल्क जमा केल्यानंतरही विशिष्ट संख्येतील यंत्रांमधील व्हीव्हीपॅट मोजले जातील व अन्य नियमच वारंवार सांगितले जातात, आकडेवारीतील तफावत, टक्केवारीत एका रात्रीत झालेला बदल वगैरे गोष्टींबाबत ते कसलाही खुलासा करायला तयार नाहीत, असे अभिषेक मनु सिंघवी यांना सांगण्यात आले. त्यानंतर अभिषेक मनु सिंघवी यांनी कोणत्या मुद्द्यांवर याचिका दाखल करता येईल याविषयी सांगितले. त्यासंबंधीची कागदपत्रे तयार करून शुक्रवारी किंवा सोमवारी याचिका दाखल  असल्याची माहिती मिळते आहे......

✍️ मोहन चौकेकर