🌟परभणी शहरातील व्यापाऱ्यांकडून प्रशासनावर टिकेचे झोड : दगडफेकीसह जाळपोळीच्या घटनेच्यावेळी बघ्याची भूमिका...!

🌟जिल्हा व्यापारी महासंघाच्या संतप्त पदाधिकारी/सदस्यांनी आज जिल्हाधिकाऱ्यांसह पोलिस अधिक्षकांच्या घेतल्या भेटी🌟

परभणी (दि.१२ डिसेंबर २०२४) : परभणी येथील जिल्हाधिकारी कार्यालयासमोरील डॉ.बाबासाहेब आंबेडकर यांच्या पुतळ्यासमोरी संविधानाच्या प्रतिकृतीच्या अवमानाच्या निषेधार्ह घटनेच्या पार्श्‍वभूमीवर काल बुधवार दि.११ डिसेंबर २०२४ रोजी आयोजित केलेल्या बंदच्या आवाहनास छोट्या मोठ्या सर्व व्यापार्‍यांनी उत्स्फूर्त प्रतिसाद दिल्यानंतरसुध्दा काही समाजकंटकांनी केलेल्या दगडफेकीसह जाळपोळीच्या घटने दरम्यान पोलिस प्रशासनाने घेतलेल्या बघ्याच्या भूमिकेबद्दल जिल्हा व्यापारी महासंघाच्या संतप्त पदाधिकार्‍यांसह सदस्यांनी गुरुवारी जिल्हाधिकारी व प्रभारी पोलिस अधिक्षकांच्या भेटी दरम्यान टिकेचे झोड उठविले.

              येथील जिल्हाधिकारी कार्यालयात आज गुरुवार दि.१२ डिसेंबर रोजी व्यापारी महासंघाच्या एका शिष्टमंडळाने जिल्हाधिकारी रघुनाथ गावडे, प्रभारी पोलिस अधिक्षक यशवंत काळे यां दोघा वरिष्ठ अधिकार्‍यांच्या गाठीभेटी घेतल्या. त्यावेळी शिवसेनेचे नेते आनंद भरोसे यांच्यासह अन्य नेते उपस्थित होते यावेळी संतप्त व्यापार्‍यांनी मंगळवारी सायंकाळची घटना निश्‍चितच निषेधार्ह आहे. त्या घटनेच्या पार्श्‍वभूमीवर विविध संघटनांनी पुकारलेल्या बंदचेही आंदोलन हे तीव्र भावनेतूनच केल्या गेले. त्या आंदोलनात शहरातील सर्व छोटे-मोठे व्यापारी मोठ्या उत्स्फूर्तपणे सहभागी झाले होते. सकाळपासून कोणीही दैनंदिन व्यवहार सुरु केला नाही. उलटपक्षी या आवाहनास उत्स्फूर्त प्रतिसाद दिला. त्यातून जबाबदारीचे दर्शन  घडवले. परंतु, असे असतांनासुध्दा आंदोलनकर्त्यांपैकी काही व्यक्तींनी, जमावाने मध्यवस्तीतील तसेच रेल्वेस्थानक, विसावा चौक भागांमधून व वसमत रस्त्यावर मोठ्या प्रमाणावर दगडफेक सुरु केली. ठिकठिकाणी टायर टाकून ते पेटवून दिले. पाठोपाठ छोट्या मोठ्या व्यापार्‍यांच्या दुकानावरील बोर्डला तसेच काचांना लक्ष केले. शटरचीही तोडफोड केली. छोट्या मोठ्या टपर्‍या उलथून फेकून दिल्या, हातगाडेसुध्दा उधळून लावले, दुपारी तीन वाजेपर्यंत संपूर्ण शहरात दंगेखोरांनी प्रचंड हैदोस घातला. परंतु, या दरम्यान, पोलिस प्रशासनास वारंवार सांगूनसुध्दा कोणीही या जमावास रोखण्याचा प्रयत्न केला नाही किंवा पांगवले सुद्धा नाही. त्याचा परिणाम असा संपूर्ण शहरात छोट्या मोठ्या व्यापार्‍यांचे कोट्यवधी रुपयांचे नुकसान झाले आहे. त्यास केवळ पोलिस व महसूल प्रशासनातील वरिष्ट अधिकारी पूर्णतः जबाबदार आहेत, असा आरोप या व्यापार्‍यांनी केला. काही पदाधिकार्‍यांनी पोलिस यंत्रणेवर टिकेचा भडीमार केला. जिल्हाधिकारी कार्यालयसुध्दा आंदोलनकर्त्यांचे लक्ष ठरल्याबद्दल तीव्र चिंता व्यक्त करीत अधिकारी, कर्मचारी काय करत होते, असा सवाल केला. शिवसेनेचे नेते भरोसे यांनी हिंसाचाराच्या या घटनांमध्ये अधिकार्‍यांनी दाखविलेल्या निष्क्रियतेबद्दल आपण वरिष्ठांकडे निश्‍चितच तक्रार नोंदवू, असे नमूद करीत घडलेल्या प्रकाराबद्दल तीव्र चिंता व्यक्त केली. आजपर्यंत इतिहासात कोणीही जिल्हाधिकारी कार्यालयास लक्ष केले नाही. याकडेही भरोसे यांनी लक्ष वेधले.

              दरम्यान,संतप्त व्यापार्‍यांनी एकूण एक नुकसानीचे पंचनामे व्हावेत, त्यातून वस्तूस्थिती निदर्शनास यावी, मालमत्तेच्या नुकसानीचा आकडा निश्‍चित करावा, पंचनाम्याच्या कॉप्या व्यापार्‍यांना द्याव्यात, पाठोपाठ मावेजासुध्दा मंजूर करीत वितरित करावा, अशी अपेक्षा या व्यापार्‍यांनी व्यक्त केली. दरम्यान, जिल्हाधिकारी गावडे व प्रभारी पोलिस अधिक्षक काळे यांनी या व्यापार्‍यांची समजूत काढण्याचा प्रयत्न केला. काही गोष्टींचा खुलासा केला. यावेळी व्यापार्‍यांनी जमावबंदीचा आदेशसुध्दा आपण तात्काळ लागू न केल्याबद्दल आश्‍चर्य व्यक्त करीत प्रशासनावर प्रश्‍नांचा भडिमार केला......