🌟परभणीत कोठडीत मृत्यू झालेल्या सोमनाथ सूर्यवंशी यांच्या कुटूंबियांची भेट घेऊन खा.शरद पवार यांनी केले सांत्वन...!

🌟या प्रकरणात आम्हास न्याय हवा आहे अशी भूमिका सुर्यवंशी कुटुंबाने खा.शरद पवार यांच्या समोर विशद केली🌟

परभणी (दि.२१ डिसेंबर २०२४) : राष्ट्रवादी शरदचंद्र पवार काँग्रेस पक्षाचे ज्येष्ठ नेते खासदार शरद पवार यांनी आज शनिवार दि.२१ डिसेंबर रोजी दुपारी परभणी दंगली संदर्भात अटकेत असताना कोठडीत मृत्यू पावलेल्या भिमसैनिक सोमनाथ सुर्यवंशी यांच्या कुटूंबियांची भेट घेवून त्यांचे सांत्वन केले.

            या भेटी दरम्यान सुर्यवंशी कुटूंबियांनी विधी महाविद्यालयात शिक्षण घेऊन वकील होवू इच्छिणार्‍या सोमनाथ याचा या पध्दतीने मृत्यू व्हावा या बद्दल तीव्र संताप व्यक्त केला. पोलिसांनी हेतुतः सोमनाथ यास दगडफेकीच्या घटनांमध्ये आरोपी केले. विविध कलमे लावली.गुन्हेगारासारखी वागणूक दिली. कोठडीत मारहाण केली.त्यामुळेच सोमनाथ याचा मृत्यू झाल्याचा दावा कुटूंबियांनी केला.या प्रकरणात आम्हास न्याय हवा आहे अशी भूमिका विशद केली.

            दरम्यान ज्येष्ठ नेते पवार यांनी आपण संपूर्ण वस्तूस्थिती जाणून घेतली आहे. निश्‍चितच या कुटूंबियांना न्याय मिळण्या संदर्भात सर्वार्थाने प्रयत्न केले जातील, अशी ग्वाही दिली. आपण राज्य सरकारच्या या सार्‍या गोष्टी निदर्शनास आणून देवू असे ते म्हणाले. यावेळी खासदार निलेश लंके, खासदार बजरंग सोनवणे, माजी मंत्री राजेश टोपे, राष्ट्रवादी काँग्रेस पक्षाचे जिल्हाध्यक्ष माजी आमदार अ‍ॅड. विजय गव्हाणे, माजी आमदार सुरेश वरपुडकर, माजी आमदार सुरेशदादा देशमुख, माजी आमदार विजय भांबळे, माजी आमदार बाबाजानी दुर्राणी, माजी आमदार सिताराम घनदाट, प्रदेश उपाध्यक्ष भिमराव हत्तीअंबीरे, भगवानराव वाघमारे यांच्यासह अन्य नेतेमंडळी यावेळी उपस्थिती होती......