🌟नांदेड विभागातील रांजणी-कोडी स्थानका दरम्यान टीएफटीआरचे काम करण्यासाठी 29 डिसेंबर पर्यंत 04 तासांचा लाईन ब्लॉक...!

🌟लाईन ब्लॉकमुळे या लोहमार्गावरील रेल्वे सेवा विस्कळीत होणार🌟

नांदेड (दि.20 डिसेंबर 2024) : दक्षिण मध्य रेल्वे विभागांतर्गत नांदेड विभागांतर्गत येणाऱ्या रांजणी-कोडी या स्थानका दरम्यान टीएफटीआरचे काम करण्याकरीता 29 डिसेंबर पर्यंत चार तासांचा लाईन ब्लॉक घेण्यात येणार असून त्यामुळे या मार्गावरुन होणाऱ्या काही रेल्वेगाड्यांवर त्याचा परिणाम होणार आहे, अशी माहिती नांदेडच्या जनसंपर्क विभागाने दिली.

काही रेल्वेगाड्या अंशतः रद्द केल्या जाणार आहेत, तर काही गाड्या उशीरा धावणार आहेत. त्यात 17617 या क्रमाकांची मुंबई-नांदेड तपोवन एक्सप्रेस तसेच 17661 या क्रमांकाची काचिगुडा-नगरसोल एक्सप्रेस 21, 22, 25, 26, 28 व 29 डिसेंबर रोजी 1 तास 30 मिनीटे उशीरा धावणार आहे. 12788 या क्रमांकाची नगरसोल-नरसापूर एक्सप्रेस 22, 25, 26 आणि 29 डिसेंबर रोजी 90 मिनीटे उशीरा धावणार आहे. तसेच 17232 नगरसोल-नरसापूर ही एक्सप्रेस सोमवार व शनिवारी म्हणजे 21 व 28 डिसेंबर रोजी 90 मिनीटे उशीराने धावणार आहे.

दरम्यान, गाडी क्रमांक 17688 धर्माबाद-मनमाड मराठवाडा एक्सप्रेस 20,22,23,26,27,29 आणि 30 डिसेंबर रोजी धर्माबाद ते नांदेड दरम्यान अंशतः रद्द करण्यात आली आहे, अशी माहिती दक्षिण मध्ये रेल्वेच्या नांदेड जनसंपर्क विभागाने दिली.....