🌟परभणी जिल्ह्यातील विधानसभा निवडणुकीच्या पार्श्वभूमीवर ईव्हीएम-व्हीव्हीपॅट मशीन पेअरिंगची ही प्रक्रिया पूर्ण....!

 

🌟मतदानादरम्यान प्रत्येक मतदान केंद्रावर ही प्रक्रिया निवडणूक आयोगाच्या मार्गदर्शक तत्त्वांनुसार काटेकोरपणे राबवणार🌟  

परभणी (दि.10 नोव्हेंबर 2024) : परभणी विधानसभा निवडणुकीचे मतदान येत्या 20 नोव्हेंबर रोजी पार पडणार आहे या पार्श्‍वभूमीवर आज रविवार दि.10 नोव्हेंबर रोजी परभणीतील वसंतराव नाईक मराठवाडा कृषि विद्यापीठाच्या कृषी अभियांत्रिकी महाविद्यालयात ईव्हीएम (इलेक्ट्रॉनिक मतदान यंत्र) आणि व्हीव्हीपॅट (मतदार पडताळणी पर्ची यंत्र) मशीनच्या पेअरिंगची प्रक्रिया पार पडली. त्यानिमित्त सकाळी 11.20 वाजता स्ट्राँग रूमचे सील उमेदवारांच्या उपस्थितीत उघडण्यात आले.

            या वेळी निवडणूक निर्णय अधिकारी तथा उपविभागीय अधिकारी परभणी दत्तू शेवाळे, सहाय्यक निवडणूक निर्णय अधिकारी तथा तहसिलदार डॉ. संदीप राजपुरे, नायब तहसिलदार अनिकेत पालेपवाड, मास्टर ट्रेनर सुभाष काचगुंडे आणि परभणी महानगरपालिका सहआयुक्त प्रज्ञावंत कांबळे हे उपस्थित होते. मतदारसंघात लढणार्‍या उमेदवारांसह त्यांच्या प्रतिनिधींनी देखील या प्रक्रियेची साक्ष दिली.

             ईव्हीएम-व्हीव्हीपॅट मशीन पेअरिंगची ही प्रक्रिया म्हणजे निवडणुकीत वापरण्यात येणार्‍या मतदान यंत्रे आणि मतदार पडताळणी यंत्रांची कार्यक्षमता तपासण्याची एक महत्वाची पायरी आहे. यामधून मतदान प्रक्रियेत पारदर्शकता आणण्याचा आणि मतदारांचा विश्‍वास दृढ करण्याचा उद्देश आहे. या प्रक्रियेत मतदान यंत्र व्यवस्थित कार्यरत असल्याची खात्री करून घेतली जाते, जेणेकरून मतदानादरम्यान कोणत्याही प्रकारची अडचण येऊ नये. 20 नोव्हेंबर रोजी होणार्‍या मतदानादरम्यान प्रत्येक मतदान केंद्रावर ही प्रक्रिया निवडणूक आयोगाच्या मार्गदर्शक तत्त्वांनुसार काटेकोरपणे राबवण्यात येणार आहे.......