🌟परभणी जिल्ह्यात विधानसभा आचारसंहिता लागू झाल्यापासून चेक पोस्टद्वारे ९९ लाख ६८ हजार रुपयांची रोख रक्कम जप्त...!

🌟अशी माहिती जिल्हाधिकारी रघुनाथ गावडे व पोलीस अधिक्षक रविंद्रसिंह परदेशी यांनी पत्रकार परिषदेत दिली🌟

परभणी (दि.२१ नोव्हेंबर २०२४) : परभणी जिल्ह्यातील परभणी,पाथरी,जिंतूर,गंगाखेड या चार विधानसभा मतदारसंघांतर्गत विधानसभा निवडणुकीची आचारसंहिता लागू झाल्यापासून मतदानाच्या अंतीम टप्प्यापर्यंत चेक पोस्टच्या माध्यमातून एकूण ९९ लाख ६८ हजार रूपयांची रोख रक्कम जप्त करण्यात आली असल्याची माहिती परभणी जिल्हा निवडणूक निर्णय अधिकारी तथा जिल्हाधिकारी रघुनाथ गावडे व पोलीस अधिक्षक रविंद्रसिंह परदेशी यांनी पत्रकार परिषदेत दिली.

           येथील जिल्हाधिकारी कार्यालयात आज गुरुवार दि.२१ नोव्हेंबर २०२४ रोजी सायंकाळी आयोजित केलेल्या पत्रकार परिषदेतून या दोघा अधिकार्‍यांनी जिल्ह्यात बुधवारी चार मतदारसंघात झालेले मतदान आणि शनिवारी दि.२३ नोव्हेंबर रोजी होणारी मतमोजणी या अनुषंगाने तपशीलवार माहिती दिली आदर्श आचारसंहितेच्या काळात या जिल्ह्यात संशयास्पदरीत्या आढळलेल्या वाहनांमधून ९९ लाख ६८ हजार रुपये एवढी रक्कम आढळली असे नमूद करीत त्या संदर्भात आता एक समिती स्थापन करुन चौकशी केली जाईल व त्यानंतर त्याबाबतची पुढील कार्यवाही केली जाणार असल्याची माहिती जिल्हाधिकारी गावडे यांनी दिली.

            दरम्यान, यावेळी अपर जिल्हाधिकारी डॉ. प्रताप काळे,   निवडणूक विभागाचे उपजिल्हाधिकारी जनार्दन विधाते, जिल्हा कोषागार अधिकारी निळकंठ पाचंगे,कोषागार अधिकारी महेश कुलकर्णी, नायब तहसीलदार सतीश रेड्डी,दत्तराव गिणगिणे, जिल्हा माहिती अधिकारी प्रमोद धोंगडे उपस्थित होते.....