🌟पुर्णेत शासकीय स्वस्त धान्य वितरण प्रणाली झाली बेलगाम ? शेंकडों शिधापत्रिकाधारक आनंदाच्या शिध्यापासून वंचित...!

🌟शासकीय स्वस्त धान्य पुरवठा विभाग कुंभकर्णी झोपेत : शासकीय स्वस्त धान्यासह आनंदाचा शिधाही काळाबाजारात ?🌟

पुर्णा (विशेष वृत्त) :- महाराष्ट्र शासनाने लोकहितास्तव सुरू केलेल्या अनेक योजनांची प्रशासकीय व्यवस्थेतील भ्रष्ट नौकरशहांनी योग्य पध्दतीने अंमलबजावणी न केल्यामुळे अनेक योजनांच्या लाभापासून सर्वसामान्य गोरगरीब जनतेला वंचित राहावे लागत नसते परंतु प्रत्येक योजनांचा लाभ सर्वसामान्य जनतेपर्यंत पोहोचविण्या अगोदर त्या योजनेचा आपणास कसा फायदा घेता येईल ही गिधाडदृष्टी असलेल्या भ्रष्ट नौकरशहांनी अनेक जनहीतवादी शासकीय योजनांचा सोईस्करित्या फडशा पाडल्याने या शासकीय योजना अक्षरशः बारगळल्याचे दिसत असून राज्य व केंद्र शासनाने शासकीय स्वस्त धान्य प्रणालीतून सर्वसामान्य जनतेला मोफत गहू तांदूळ वाटपासह सर्वसामान्य जनतेला सन उत्सव आनंदात साजरा करता यावा याकरिता 'आनंदाचा शिधा' नामक योजना देखील सुरू केली या योजने अंतर्गत अंत्योदय शिधापत्रिकाधारक व प्राधान्य गटातील शिधापत्रिका धारकांना केवळ १००/- रुपयात चनाडाळ – १ किलोग्राम,सोयाबीन तेल – १ लिटर,साखर – १ किलोग्राम,रवा – १ किलोग्राम या चार वस्तू शासकीय स्वस्त धान्य प्रणालीतून देण्यात येतात.

राज्यात सर्वत्र या 'आनंदाचा शिधा' योजनेची अत्यंत काटेकोरपणे अंमलबजावणी होत असतांना मात्र 'जगात जर्मनी,भारतात परभणी अन् परभणीत पुर्णा आणी पुर्णेतील प्रशासकीय व्यवस्थेत कार्यरत भ्रष्ट नौकरशहांना गिळंकृत करायला काहीच पुरणा' अशी एकंदर अवस्था झाल्याचे निदर्शनास येत असून मागील एप्रिल महिन्यातील लोकसभा निवडणूक काळापासून या 'आनंदाचा शिधा' योजनेवर आदर्श आचारसंहितेच्या नावावर संक्रांत आल्याने एप्रिल महिन्यात गुडी पाडवा/रमजान ईद तसेच भिम जयंतीच्या पार्श्वभूमीवर पुरवठा विभागाकडून शिधापत्रिका धारकांना वितरीत करण्यासाठी प्राप्त झालेल्या 'आनंदाचा शिधा' किटसह साड्या देखील पुर्णा शहरातील पंधरा दुकानदारांसह ग्रामीण भागातील एकशें एक शासकीय स्वस्त धान्य दुकानदारांनी पुरवठा विभागातील गिधाडदृष्टीच्या भ्रष्ट नौकरशहांसह शासकीय स्वस्त धान्य तस्करांना हाताशी धरुन अक्षरशः गडप करीत आनंदोत्सव साजरा केल्याची जोरदार चर्चा होत असतांनाच त्याच घटनांची पुनरावृत्ती पुन्हा एकदा दसरा-दिवाळी सनाच्या काळात देखील होत असून शहरातील १६ शासकीय स्वस्त धान्य दुकानदारांसह ग्रामीण भागातील १०१ शासकीय स्वस्त धान्य दुकानदारांनी पुरवठा विभागाच्या निर्देशानुसार महाराष्ट्र विधानसभा निवडणुकीची आचारसंहिता दि.१५ आक्टोंबर २०२४ रोजी लागण्यापूर्वी वाटप करण्याची आवश्यकता होती परंतु पुरवठा विभागाने दि.०२ आक्टोंबर २०२४ पर्यंत जवळपास सर्वच ११६ शासकीय स्वस्त धान्य दुकानदारांना शासकीय स्वस्त धान्य प्रणालीतील गहू तांदूळासह 'आनंदाचा शिधा' किटचे देखील वितरण करुन विधानसभा निवडणुक आचारसंहिता लागण्यापूर्वी प्रथमतः 'आनंदाचा शिधा' चे व त्यानंतर गहू तांदूळाचे वाटप करण्यात यावे असे निर्देश दिले परंतु दुर्दैवाची बाब म्हणजे अनेक शासकीय स्वस्त धान्य दुकानदार भामट्यांनी शेकडो सर्वसामान्य गोरगरीब शिधापत्रिका धारकांना या 'आनंदाचा शिधा' किटसह गहू तांदूळापासून देखील वंचित ठेवून त्यांना आचारसंहितेचा बडगा दाखवत त्यांच्या तोंडचा घास पळवण्याचा निच प्रकार चालवल्याचे दिसत आहे.

राज्यातील सर्वच जिल्ह्यांमध्ये 'आनंदाचा शिधा' किट पासून एकही लाभार्थी वंचित राहू नयेत याकरिता शासकीय स्वस्त धान्य दुकानदारांना १०० टक्के किटचे वितरण करण्यात आले असतांना मात्र परभणी जिल्ह्यात विशेष करुन पुर्णा तालुक्यात मात्र शासकीय स्वस्त धान्य दुकानदारांना ८५ टक्केच किटचे वितरण का करण्यात आले ? असा प्रश्न उपस्थित होत असून यात देखील काहीतरी सावळा गोंधळ झाला असावा असा अंदाज व्यक्त होत असून परभणी जिल्ह्याचे जिल्हाधिकारी रघुनाथ गावडे यांनी तात्काळ या प्रकरणाची सखोल चौकशी करून प्रत्येक शासकीय स्वस्त धान्य दुकानदारांच्या दुकानासमोर पुरवठा विभागातील अधिकाऱ्यांसमक्ष चावडी वाचन करण्याचे आदेश जारी करीत संबंधित शासकीय स्वस्त धान्य दुकानदार दोषी आढळल्यास त्यांच्या दुकानाच परवाना रद्द करुन त्याच्यावर गुन्हा देखील दाखल करण्यात यावा अशी मागणी सर्वसामान्य जनतेतून होत आहे.....