🌟सुप्रीम कोर्टाने सुनावले एकतर वकीली करा किंवा पत्रकारिता डबल रोल जमणार नाही🌟
बार कौन्सिल ऑफ इंडियाच्या नियमानुसार दुहेरी भूमिका बजावण्यास मनाई असताना वकिलाला पत्रकारितेसारख्या व्यवसायाची दुहेरी भूमिका कशी काय करता येईल, असा प्रश्न सर्वोच्च न्यायालयाने उपस्थित केला आहे. न्यायमूर्ती अभय एस ओका आणि न्यायमूर्ती ऑगस्टीन जॉर्ज मसिह यांच्या खंडपीठाने स्पष्टपणे सांगितले की, कोणत्याही वकिलाला दुटप्पी भूमिका बजावण्याची परवानगी दिली जाऊ शकत नाही गेल्या सुनावणीतही न्यायालयाने वकिलाच्या दुटप्पी भूमिकेवर प्रश्न उपस्थित करत याला व्यावसायिक गैरवर्तन असल्याचे म्हटले होते.
आज सोमवार दि.२१ आक्टोंबर रोजी पुन्हा त्या खटल्याची सुनावणी सुरू झाली तेव्हा न्यायमूर्ती ओका म्हणाले, "तुम्ही एकतर वकिली करू शकता किंवा पत्रकारिता करू शकता आम्ही अशा प्रकारची वकिली होऊ देणार नाही" त्यावेळी पत्रकार म्हणून कार्यरत असलेल्या आरोपी वकिलाला न्यायालयाने विचारले की बार कौन्सिलच्या नियमानुसार अशा दुहेरी भूमिका बजावण्यास मनाई आहे, मग आम्ही तुम्हाला हे करण्याची परवानगी कशी देऊ शकतो.
न्यायमूर्ती ओका म्हणाले, "आम्ही अशा दुहेरी भूमिकेला परवानगी देऊ शकत नाही. हा एक उदात्त पेशा आहे. तुम्ही स्वतंत्र पत्रकार आहात, असेही तुम्ही म्हणू शकत नाही" यानंतर खंडपीठाने वकील-सह-पत्रकाराच्या याचिकेवर उत्तर दाखल करण्यासाठी बार कौन्सिल ऑफ इंडियाला नव्याने नोटीस बजावली. प्रकरण मोहम्मद कामरान विरुद्ध उत्तर प्रदेश राज्य आणि इतर आहे.
खरंतर डॉ. मोहम्मद कामरान अलाहाबाद हायकोर्टात कायद्याची प्रॅक्टिस करतात आणि त्यासोबत ते फ्रिलान्स पत्रकारिताही करतात त्यांनी भाजपचे माजी खासदार आणि भारतीय कुस्ती संघटनेचे माजी अध्यक्ष ब्रिजभूषण शरण सिंह यांच्याविरुद्ध फौजदारी मानहानीचा खटला दाखल केला होता जो अलाहाबाद उच्च न्यायालयाने फेटाळला होता कामरान यांनी आपल्या याचिकेत आरोप केला होता की भाजपचे तत्कालीन खासदार ब्रिजभूषण शरण सिंह यांनी आपली बदनामी करण्यासाठी सप्टेंबर २०२२ मध्ये मुख्यमंत्री योगी आदित्यनाथ आणि उत्तर प्रदेशच्या मुख्य सचिवांना पत्रे लिहिली होती. या वर्षी मार्चमध्ये हायकोर्टाने कामरानची मानहानीची याचिका फेटाळल्यानंतर त्याने त्याविरुद्ध सर्वोच्च न्यायालयात अपील दाखल केले.
अपील याचिकेत कामरानने लिहिले की, तो वकील आणि पत्रकार दोन्ही आहे. यावर सुप्रीम कोर्टाने चिंता आणि नाराजी व्यक्त केली आणि सांगितले की, नियमानुसार वकिलाला दुसरा कोणताही व्यवसाय स्वीकारता येत नाही. खंडपीठाने उत्तर प्रदेश बार कौन्सिल आणि बार कौन्सिल ऑफ इंडिया (BCI) यांच्याकडून अपीलकर्ता मोहम्मद कामरान यांच्यावर कारवाई करण्याबाबत उत्तर मागितले आहे.
0 टिप्पण्या