🌟पुर्णेत ईव्हीएम-व्हीव्हीपॅट जनजागृती मोहिमेचे उद्घाटन : विधानसभा निवडणूक जनजागृतीसाठी दोन मोबाईल व्हॅन....!

🌟जनजागृती मोहिमेचे तहसिलदार माधवराव बोथीकर यांच्या हस्ते उद्घाटन करण्यात आले🌟

पुर्णा (दि.02 आक्टोंबर 2024) : परभणी जिल्ह्यातील गंगाखेड विधानसभा मतदारसंघांतर्गत येणाऱ्या पुर्णा तालुक्यात आज बुधवार दि.02 आक्टोंबर रोजी ईव्हीएम-व्हीव्हीपॅट जनजागृती मोहिमेचे तहसिलदार माधवराव बोथीकर यांच्या हस्ते उद्घाटन करण्यात आले.

             भारत निवडणूक आयोगाच्या निर्देशानुसार आगामी काळात होणार्‍या विधानसभा निवडणुकीच्या अनुषंगाने  जिल्हाधिकारी रघुनाथ गावडे व गंगाखेडचे उपविभागीय अधिकारी जिवराज डापकर यांच्या मार्गदर्शनाखाली 06 ऑक्टोबर 2024 पर्यंत ही मोहिम चालणार आहे. या मोहिमेसाठी पूर्णा तालुक्यास दोन मोबाईल व्हॅन प्राप्त झालेल्या असून पूर्णा तालुक्यातील सर्व गावांंमध्ये सर्व मतदान केंद्रावर जसे,शाळा,महाविद्यालय, ग्रामपंचायत आठवडी बाजार येथे प्रत्यक्ष जाऊन तहसील कार्यालयाची पथके जनजागृतीसाठी मतदान यंत्राची माहिती देणार आहेत. तसेच मतदान गुप्त व सुरक्षित कसे आहेत हे प्रात्यक्षिक दाखवून देत आहेत.

               पूर्णा तालुक्यातील सुजाण मतदारांनी या पथकांकडून आपल्या मताची खात्री करून घ्यावी आणि काही शंका असल्यास त्याचे निरसन तहसील कार्यालयाच्या पथकाकडून करून घ्यावे, असे आवाहन तहसीलदार बोथीकर यांनी केले आहे. आगामी काळात होणार्‍या निवडणुकीमध्ये मतदानाचा टक्का वाढावा आणि जास्तीत जास्त मतदारांनी मतदान करावे यासाठी ही मोहिम हाती घेतल्याचे तहसीलदार बोथीकर यांनी सांगितले.  

              दरम्यान, याप्रसंगी नायब तहसीलदार प्रशांत थारकर, नायब तहसीलदार पंढरीनाथ शिंदे, अव्वल कारकून व्यंकटेश जज्जरवार, तांत्रिक सहाय्यक अरविंद पंडीत, तलाठी गणेश गोरे, कोतवाल शिवप्रसाद देवने, मास्टर ट्रेनर, पोलीस गार्ड व इतर कर्मचारी उपस्थित होते.....