🌟शेतकरी नेते रविकांत तुपकरांची भूमिका अखेर ठरली...महाविकास आघाडीसोबत जाणार नाही.....!

🌟राज्यातील काही मतदारसंघात कार्यकर्त्यांना अर्ज दाखल करण्याच्या सूचना🌟

🌟बुलडाण्यात काय करायचं..? २९ ऑक्टोबरपर्यंत ठरणार🌟

✍️ मोहन चौकेकर 

बुलडाणा (दि.२६ आक्टोंबर २०२४) : - महाविकास आघाडी सोबत चर्चा फिस्कटल्यानंतर रविकांत तुपकर यांची भूमिका काय राहणार याकडे साऱ्यांचे लक्ष लागून होते. अखेर आता तुपकर यांनी त्यांची भूमिका जाहीर केली असून, महाविकास आघाडीने सन्मानाने सोबत घेतले नाही, मग त्यांच्यासोबत फरपटत कशाला जायचे...? अशी पदाधिकारी-कार्यकर्त्यांची भूमिका असल्याने महाविकास आघाडी सोबत जाणार नाही, अशी भूमिका रविकांत तुपकर यांनी जाहीर केली आहे. शिवाय राज्यातील काही मतदारसंघात अर्ज दाखल करण्याच्या सूचना कार्यकर्त्यांना देण्यात आल्या आहेत. बुलडाणा विधानसभा मतदारसंघात काय करायचे याबाबतचा निर्णय २९ ऑक्टोबरला घेणार असल्याचे रविकांत तुपकरांनी सांगितले. आज बुलडाणा येथे रविकांत तुपकर यांनी आज प्रमुख पदाधिकाऱ्यांची तातडीची बैठक बोलवली होती. या बैठकीत अनेक विषयांवर निर्णय घेण्यात आले. या बैठकीनंतर रविकांत तुपकर यांनी माध्यमांशी बोलतांना आपली भूमिका जाहीर केली.

           महाविकास आघाडीसोबत जावे अशी आमच्या पदाधिकारी-कार्यकर्त्यांची इच्छा होती, त्यासंदर्भात महाविकास आघाडीच्या वरीष्ठ नेत्यांशी चर्चा देखील झाली होती. या चर्चेत बुलढाण्याच्या जागेसंदर्भात सकारात्मक निर्णय देखील झाला होता. परंतु वेळेवर हा निर्णय बदलला गेला. त्यांना जर आपली गरज नसेल, सन्मानाने सोबत घेत नसतील तर आपण फरफटत त्यांच्यासोबत जायचे नाही, अशी सर्व पदाधिकारी व कार्यकर्त्यांची भूमिका असल्याने आम्ही महाविकास आघाडीसोबत जाणार नाही, अशी भूमिका रविकांत तुपकरांनी बुलढाणा येथे झालेल्या बैठकीनंतर जाहीर केली. यावेळी बोलतांना रविकांत तुपकर म्हणाले की याबैठकीत विधानसभा निवडणुकीच्या अनुषंगाने अनेक निर्णय झाले. त्यानुसार काही मतदारसंघात कार्यकर्त्यांनाअर्ज दाखल करण्याच्या सूचना आम्ही दिल्या आहे. त्यानुसार २९ ऑक्टोबर पर्यंत उमेदवारी अर्ज दाखल करतील, तसेच राज्यातील अनेक मतदारसंघात स्वच्छ चारित्र्याच्या, शेतकरी चळवळीशी पार्श्वभूमी असलेल्या चांगल्या विचाराच्या अपक्ष उमेदवारांना क्रांतिकारी शेतकरी संघटनेच्या वतीने पाठिंबा देणार असल्याची भूमिका रविकांत तुपकरांनी स्पष्ट केली. बुलडाणा विधानसभा मतदारसंघाबाबत काय निर्णय घ्यायचा याबाबत आम्ही २९ ऑक्टोबर पर्यंत ठरवू असेही तुपकर यांनी जाहीर केले...

* क्रांतिकारी शेतकरी संघटना अपक्ष व चळवळीची पार्श्वभूमी असलेल्या उमेदवारांना देणार पाठिंबा :-

क्रांतिकारी शेतकरी संघटना ही सामाजिक संघटना आहे. आमच्याकडे पक्ष नाही, त्यामुळे काही मतदारसंघात आमचे कार्यकर्ते अपक्ष अर्ज दाखल करतील व त्यांना क्रांतिकारी शेतकरी संघटना पाठिंबा देईल, त्यांच्याबरोबर राज्यातील अनेक मतदारसंघात स्वच्छ चारित्र्याच्या, शेतकरी चळवळीशी पार्श्वभूमी असलेल्या चांगल्या विचाराच्या अपक्ष उमेदवारांना क्रांतिकारी शेतकरी संघटनेच्या वतीने पाठिंबा देणार असल्याची भूमिका रविकांत तुपकरांनी यावेळी स्पष्ट केली.

✍️ मोहन चौकेकर