🌟परभणी जिल्ह्याच्या शिरपेचात मानाचा तुरा : शहरातील गांधी विद्यालयाचा विद्यार्थी झाला जिल्हाधिकारी....‌!

🌟परभणीतील कुणाल चव्हाण यांची ओरिसात जिल्हाधिकारीपदी नियुक्ती संस्थेच्या वतीने करण्यात आला सत्कार🌟

परभणी (दि.07 ऑगस्ट 2024) :- परभणी येथील एकता नगर परिसरातील गांधी विद्यालयात शिक्षण घेतलेले कर्तृत्ववान विद्यार्थी कुणाल मोतिराम चव्हाण यांची ओडिसा राज्यात जिल्हाधिकारी पदी नियुक्ती झाल्याबद्दल काल मंगळवार दि.06 ऑगस्ट 2024 रोजी संस्थेच्या वतीने एका कार्यक्रमातून त्यांचा गौरव करण्यात आला.

            कार्यक्रमाच्या अध्यक्षस्थानी नेहरू एज्युकेशन सोसायटीचे अध्यक्ष डी. एन. लाडके तर प्रमुख पाहुणे म्हणून सचिव दिपकरराव खिस्ते, संचालक डॉ. प्रभाकरराव गमे, रमाकांतराव लाडके, प्रभाकरराव बोराडे, मुकुंदराव खिस्ते, पि. के. केंद्रेकर, जी. एन.अरमाळ, बि. डी. लाडके हे यांच्यासह मुख्याध्यापक बि. डी. आयनिले, उपमुख्याध्यापक पि.आर. नरवाडे, आर. आर. जाधव, ज्ञानेश्‍वर नखाते, पि. आर. जाधव, रेखा पाचपिल्ले यांची उपस्थिती होती.

           प्राथमिक, माध्यमिक शिक्षण घेत असताना कुणालच्या गुणवत्ते बाबत शिक्षकांना त्याचे कौतुक वाटत असे. शिस्त, अभ्यासात सातत्य, विनम्रता आणि आत्मविश्‍वास यांच्या बळावर स्पर्धा परीक्षेत कुणालने हे यश मिळवले आहे, असे उपस्थित शिक्षकांनी यावेळी सांगितले. तसेच शाळेचा एक विद्यार्थी उच्च पदस्थ अधिकारी होत असल्याने संस्थेला व शाळेला सार्थ अभिमान वाटतो, अशा भावनाही व्यक्त केल्या.

           यावेळी कुणाल चव्हाण यांच्यासह त्यांच्या पालकांचाही मान्यवरांच्या हस्ते सत्कार करण्यात आला. विद्यार्थ्यांनी आपलं ध्येय निश्‍चित करून जीव लावून त्याचा सतत पाठपुरावा केला तर निश्‍चितच यश मिळते, अशी प्रतिक्रिया कुणाल यांनी यावेळी व्यक्त केली. सुत्रसंचालन बबन आव्हाड यांनी तर आभार श्‍वेता जोशी यांनी मानले. यावेळी सर्व विद्यार्थी, शिक्षक, शिक्षकेत्तर कर्मचारी यांची उपस्थिती होती.