🌟मराठा-कुणबी जात प्रमाणपत्र समिती गुरुवारी परभणीत.....!

🌟नागरिकांनी त्यांच्याकडील दस्तावेज उपलब्ध करून द्यावेत - जिल्हाधिकारी रघुनाथ गावडे 

परभणी (दि.17 ऑक्टोंबर) : मराठा-कुणबी, कुणबी-मराठा जातीचे जात प्रमाणपत्र पात्र व्यक्तींना देण्याबाबतची कार्यपद्धती विहीत करण्यासाठी गठित केलेल्या समितीचे अध्यक्ष न्यायमूर्ती संदीप शिंदे (निवृत्त) व समिती सदस्य हे गुरुवार दि.19 ऑक्टोंबर 2023 रोजी परभणी जिल्हा दौऱ्यावर येत आहेत. त्यामुळे नागरिकांनी त्यांच्याकडे असलेल्या मराठा-कुणबी, कुणबी –मराठा जात प्रमाणपत्राशी संबंधित 1967 पूर्वीचे कुणबी असल्याचे पुरावे गुरुवारी समितीकडे उपलब्ध करून देण्याचे आवाहन जिल्हाधिकारी रघुनाथ गावडे यांनी केले आहे. 

या दौऱ्या दरम्यान, समितीचे अध्यक्ष व सदस्य कामकाजाच्या अनुषंगाने छत्रपती संभाजीनगर विभागातील (मराठवाडा) सर्व जिल्ह्यांमध्ये बैठक घेत आहेत. जिल्ह्यातील नागरिकांनी त्यांच्याकडील उपलब्ध निजामकालीन पुरावे, वंशावळी, शैक्षणिक पुरावे, महसूली पुरावे, निजाम काळात झालेले करार, निजामकालीन संस्थानिकांनी दिलेल्या सनदी, राष्ट्रीय दस्तावेज इ. समितीस उपलब्ध करुन द्यावेत. समितीची बैठक गुरुवारी सकाळी 11 वाजता जिल्हाधिकारी कार्यालयात होणार असून, त्यानंतर नागरिकांनी त्यांच्याकडे असलेले 1967 पूर्वीचे कुणबी असल्याचे पुरावे उपलब्ध करुन द्यावेत. समिती अध्यक्ष आणि सदस्य गुरुवारी जिल्हाधिकारी कार्यालयात येणार आहेत. या दिवशी दुपारी 2 ते 4 या वेळेत नागरिकांकडून पुरावे स्विकारले जातील. समितीकडे पुरावा सादर करताना शक्यतो साक्षांकित असावा, असे जिल्हाधिकारी रघुनाथ गावडे यांनी कळविले आहे....

*****