🌟राज्यातील शेतकऱ्यांवर संकट ; मात्र परिस्थिती सुधारेल ही अपेक्षा : राज्य सरकार सर्वार्थाने शेतकऱ्यांच्या पाठीशी🌟
मुंबई (दि.13 सप्टेंबर 2023) - आपल्या कृषी प्रधान देशात शेतकऱ्यांचा मित्र असलेल्या बैलाचा सण म्हणजे, बैल पोळा! यानिमित्ताने सर्व शेतकरी बांधवाना माझ्या मनापासून शुभेच्छा! असा संदेश पोळ्याच्या पूर्वसंध्येला कृषिमंत्री धनंजय मुंडे यांनी राज्यातील शेतकरी बांधवांना दिला आहे.
राज्यातील बहुतांश भागात व विशेषकरून मराठवाड्यात अद्यापही समाधानकारक पाऊस झालेला नाही, परतीच्या पावसाने पाण्याची कमी भरून निघेल अशा अपेक्षा असल्या तरीही खरीप हंगामातील पिकांवर संकट आहे. या काळात राज्य सरकार सर्वार्थाने शेतकऱ्यांना दिलासा व आधार देण्यासाठी खंबीरपणे पाठीशी उभे राहिल. शेतकऱ्यांना हक्काचा पीकविमा मिळण्यासाठी शासन कटिबद्ध राहून निर्णय घेत आहे. त्याचबरोबर राज्याचे मुख्यमंत्री व दोन्हीही उपमुख्यमंत्री यांच्याशी चर्चा करून अन्य आवश्यक उपाययोजना देखील करण्यात येतील, असा विश्वास यानिमित्ताने धनंजय मुंडे यांनी व्यक्त केला आहे.
संकट असले तरी पारंपरिक सण-उत्सव साजरे करण्याची आपली परंपरा राहिली आहे. राज्यातील शेतकरी बांधवांना दिलासा देण्याची जबाबदारी ही सरकारची आहे, सोबतच शेतकऱ्यांच्या सुख-दुःखात, सण-उत्सवात देखील आम्ही सहभागी आहोत, असेही यानिमित्ताने धनंजय मुंडे यांनी म्हटले आहे....
0 टिप्पण्या