🌟जळगावातील छत्रपती शिवाजी महाराज नगरात जुनी कालबाह्य इमारत कोसळल्याची दुर्दैवी घटना....!

🌟कोसळलेल्या इमारतीखाली एक महिला अडकली बचावकार्य सुरु🌟

जळगाव (दि.३० आगस्ट २०२३) - खांन्देशची आर्थिक राजधानी असलेल्या जळगाव शहरात अनेक जुन्या व कालबाह्य झालेल्या इमारती असून अश्या धोकादायक इमारतीच्या मालमत्ता धारकांना जळगाव महानगर पालिका प्रशासनाने नोटीसा बजावल्या नंतर देखील या इमारती जमीनदोस्त करण्यास संबंधित मालमत्ता धारक टाळाटाळ करीत असल्याचे दिसत असून अशीच एक शहरातील छत्रपती शिवाजी महाराज परिसरातील मस्जिद जवळ असलेली जुनी कालबाह्य इमारत काल मंगळवार दि.२९ आगस्ट २०२३ रोजी सकाळी ०९-०० वाजेच्या सुमारास कोसळली असून या इमारती खाली एक महिला अडकली असून तिला बाहेर काढण्यासाठी बचावकार्य सुरू झाले आहे.

घटनास्थळावरून मिळालेल्या माहितीनुसार, जळगाव शहरात अनेक जुन्या इमारती असून मनपा प्रशासनाने त्या मालमत्ताधारकांना नोटीस देखील बजावल्या आहेत. मंगळवारी सकाळी छत्रपती शिवाजी महाराज नगरात असलेली एक जुनी इमारत ९ वाजेच्या सुमारास अचानक कोसळली. इमारतीच्या ढिगाऱ्याखाली राजश्री सुयोग पाठक वय ५२ वर्षे ही महिला अडकली असून तिला बाहेर काढण्यासाठी बचावकार्य सुरू झाले आहे. या घटनेत दोन जणांना सुदेवाने बाहेर काढण्यात यश आले असून एक महिला घरात अडकली असल्याचे समजते. घटनास्थळी नागरिकांची मोठी गर्दी जमली असून पोलिसांनी धाव घेतली आहे. इमारत जीर्ण झालेली असल्याने त्यात फारसे कुटुंब रहिवास करीत नसल्याने मोठी हानी टळली आहे. जळगाव शहरातील इतर जीर्ण इमारतींच्या बाबतीत मनपा प्रशासनाने लवकरात लवकर कठोर पाऊले न उचलल्यास भविष्यात मोठी दुर्घटना घडण्याची शक्यता आहे......