🌟प्रहार जनशक्ती पक्षाच्या तक्रारीची जिल्हाधिकारी आंचल गोयल यांच्या कडून दखल....!

🌟डांबर रस्ते प्रकरणात तात्काळ चौकशी करून केलेल्या कार्यवाहीचा अहवाल सादर करण्याच्या मनपा आयुक्तांना सूचना🌟

परभणी (दि.१४ जुलै २०२३) - परभणी शहर महानगरपालिकेने भर पावसाळ्यामध्ये डांबर रस्ते करण्याच्या कामाचा सपाटा लावला असून मागील पंधरा दिवसात १५ ते २० ठिकाणी डांबर रस्ते करण्याचे काम सुरू आहे,  मुळात केंद्र व राज्य शासनाच्या शासन आदेशानुसार व बांधकाम विभागाच्या नियमावलीनुसार पावसाळ्यात केलेले डांबरी रस्ते अथवा डांबरीकरण टिकत नसल्याने पावसाळ्यामध्ये म्हणजेच जून ते सप्टेंबर या चार महिन्यात कुठल्याही प्रकारचे डांबरी रस्ते अथवा डांबरीकरण करण्यात येऊ नये असे स्पष्ट आदेश असतानाही आणि जे कंत्राटदार डांबरीकरणाचे काम करतात त्यांना देण्यात आलेल्या कंत्राटाच्या कार्यारंभ आदेशात ( वर्क ऑर्डर ) मध्ये  जून ते सप्टेंबर या चार महिन्यांमध्ये काम करू नये असा स्पष्ट उल्लेख असताना देखील परभणी शहर महानगरपालिका हद्दीतील रस्त्यांवर सर्व नियम व शासन आदेश पायदळी तुडवून भर पावसात नियमबाह्य पद्धतीने डांबरी रस्ते करण्याचे काम सुरू होते.

याबाबत प्रहार जनशक्ती पक्षाचे जिल्हाप्रमुख शिवलिंग बोधने यांनी पक्षाच्या शिष्टमंडळासह दि. ११ जुलै २०२३ रोजी जिल्हाधिकारी यांना निवेदन देऊन परभणी शहर महानगरपालिकेच्या वतीने भर पावसाळ्यात नियमबाह्य पद्धतीने शहरात सुरू असलेल्या डांबरी रस्ते बनविण्याच्या कामाची चौकशी करून ज्या मनपा अभियंत्यांनी या कामांना परवानगी दिली त्या अभियंत्यांची व ज्या कंत्राटदारांनी हे काम केले कंत्राटदारांची व या सर्व डांबर रस्ते  कामांची चौकशी करून संबंधित कंत्राटदार व मनपा अभियंत्यांवर कठोर कारवाई करावी तसेच डांबरीकरणाची करण्यात आलेली कामे याची गुणवत्ता तपासावी याबाबत तक्रार निवेदनाद्वारे दिली होती.

प्रहार जनशक्ती पक्षाच्या या तक्रारीची तत्काळ दखल घेत आज दि. १४ जुलै २०२३ रोजी जिल्हाधिकारी यांनी शहरात नियमबाह्य पद्धतीने करण्यात येत असलेल्या डांबर रस्त्या प्रकरणाची चौकशी करून कार्यवाही करावी व केलेल्या कार्यवाही बाबत लेखी अहवाल सादर करावा अश्या लेखी सूचना परभणी मनपा आयुक्त यांना दिल्या आहेत या बाबत जिल्हा प्रशासन अधिकारी, नगर पालिका प्रशासन, जिल्हाधिकारी कार्यालय यांनी लेखी पत्र मनपा आयुक्तांना पाठवले आहे.

निवेदनावर प्रहार जनशक्ती पक्षाचे जिल्हाप्रमुख शिवलिंग बोधने, मीडिया प्रभारी नकुल होगे, सरचिटणीस ॲड. सुवर्णाताई देशमुख, उपशहर प्रमुख सुषमाताई देशपांडे, बाळा नरवाडे, शहर चिटणीस वैभव संघई, रामेश्वर पुरी, दीपक भुस, शेख बशीर इत्यादींच्या स्वाक्षऱ्या आहेत..