🌟मालेगाव तालुक्यातील ग्राम किन्हीराजा येथे बनावट हॉस्पिटलवर छापा टाकून बोगस बंगाली डॉक्टरला अटक..!

🌟मालेगाव तालुका आरोग्य अधिकारी डॉ.संतोष प्रल्हादराव बोरसे यांच्या फिर्यादीवरून गुन्हा दाखल🌟

फुलचंद भगत

मंगरुळपीर:-समाजामध्ये वैद्यकीय पेशातील लोकांना देवाच्या बरोबरीचा दर्जा दिला जातो. कारण दुखण्याने त्रस्त झालेल्या जीवाला डॉक्टरच त्याच्या वैद्यकीय उपचाराने बरे करू शकतात, त्यांच्या वेदना बंद करू शकतात. परंतु काही लोक मात्र कुठल्याही प्रकारचे वैद्यकीय शिक्षण न घेता स्वतः डॉक्टर असल्याचे भासवतात व रुग्णांवर उपचार करून त्यांच्या जीवाशी खेळतात. या पार्श्वभूमीवर मालेगाव तालुक्यातील पो.स्टे.जऊळका हद्दीतील ग्राम किन्हीराजा येथील एका बनावट डॉक्टरांना पोलिसांनी ताब्यात घेत त्याच्यावर कायदेशीर कारवाई केली आहे.

     मालेगाव तालुक्यातील किन्हीराजा या गावात बनावट डॉक्टर असल्याची गुप्त माहिती प्राप्त झाल्यावरून पो.स्टे.जऊळका येथील पोलीस पथकाने आरोग्य विभागाच्या समन्वयाने दि.१७ जुलै, २०२३ रोजी दवाखान्यावर छापा टाकला. सदर ठिकाणी मोठ्या प्रमाणात औषध साठा ज्यामध्ये IV Fluid, Anti Cold Tablet, Steroid Injection, Broncho Dialator Injection, Anti Pyretic Injection/Tablets, Antacid, Pain Killer, Injection/Tablet, IV Set, Scalp Vein Set, Dressing material व इतर वैद्यकीय वस्तू मिळून आल्या. कोणत्याही प्रकारची वैद्यकीय शिक्षण पदवी व परवाना नसताना एक व्यक्ती हा स्वतः डॉक्टर असल्याचे भासवून रुग्णांच्या आरोग्याशी खेळत होता.

    सदरची कारवाई मा.पोलीस अधीक्षक श्री.बच्चन सिंह(IPS), अपर पोलीस अधीक्षक श्री.भारत तांगडे यांच्या मार्गदर्शनाखाली सपोनि.प्रदीपकुमार राठोड, पोना.दामोदर,पोकॉ.दीपक कावरखे, गोपाल कव्हर यांच्यासह वैद्यकीय पथकातील डॉ.संतोष बोरसे, डॉ.किशोर काळबांडे, दिलीप देवकते यांनी छापा टाकून ही कारवाई केली. मालेगाव तालुका आरोग्य अधिकारी डॉ.संतोष प्रल्हादराव बोरसे यांच्या फिर्यादीवरून पो.स्टे.जऊळका येथे अप.क्र.२४३/२३, कलम २७६, ४१९ भादंवि सहकलम ३३ महाराष्ट्र वैद्यकीय अधिनियम १९६१ अन्वये शाबुज संतोष बिश्वास,वय ४५ वर्षे, रा.रंगपूर रामकृष्णपल्ली, कोलकाता ह.मु.किन्हीराजा या बनावट डॉक्टरविरुद्ध गुन्हा दाखल करण्यात आला असून पुढील तपास सुरू आहे.

     श्री.बच्चन सिंह (IPS) पोलीस अधीक्षक, वाशिम यांनी सर्व जनतेस सुजाण नागरिक या नात्याने अशा प्रकारची काही तक्रार असल्यास नियंत्रण कक्षास माहिती द्यावी त्या इसमाचे नाव गोपनीय ठेवण्यात येईल,असे आवाहन केले आहे.

प्रतिनीधी:-फुलचंद भगत

मंगरुळपीर/वाशीम

मो.8459273206