🌟'शासकीय योजनांची जत्रा' उपक्रमाचा लाभ घेऊन मोहीम यशस्वी करा - उपविभागीय अधिकारी दत्तु शेवाळे

🌟राज्य शासनाच्या सर्व योजना एकाच छताखाली आणून जिल्ह्यातील ७५ हजार लाभार्थ्यांना योजनांचा लाभ देणार🌟

परभणी (दि.०४ मे २०२३): राज्य शासनाकडून 'शासकीय योजनांची जत्रा' ही महत्त्वाकांक्षी मोहीम १५ एप्रिलपासून १५ जूनपर्यंत राज्यभरात राबविण्यात येणार आहे. त्यामुळे नागरिकांनी या मोहिमेचा लाभ घेत तालुका प्रशासन तसेच सर्व नागरिकांनी यशस्वी करावी असे आवाहन उपविभागीय अधिकारी दत्तु शेवाळे यांनी केले आहे. 

राज्य शासनाच्या सर्व योजना एकाच छताखाली आणून, जिल्ह्यातील किमान ७५ हजार लाभार्थ्यांना योजनांचा लाभ देण्यात येणार आहे. राज्य शासनाच्या महासंकल्पानुसार जिल्हाधिकारी श्रीमती आंचल गोयल यांच्या आदेशानुसार परभणी उपविभागांतर्गंत तालुक्यातील जनतेला अंदाजे १० हजार सेवा देण्याचा मानस करण्यात येणार आहे. त्या सेवांमध्ये संजय गांधी निराधार योजना, इंदिरा गांधी आवास योजना, श्रावणबाळ आदी योजनांचा दिव्यांगांना प्राधान्याने लाभ देणे, शिधापत्रिका व संबंधित सर्व योजना, तहसील कार्यालयातील अभिलेख विभागातून जनतेस आवश्यक असलेल्या कागदपत्रांच्या नक्कल प्रती उपलब्ध करून देणे, निवडणूक विभागामार्फत अंदाजे ४ हजार मतदारांना ओळखपत्र वाटप करणे, मतदार यादीत नवीन नावे अंतर्भूत करणे, तसेच मयतांची नावे वगळणे, नाव, वय, पत्ता फोटो याबाबत दुरुस्ती करून माहिती अद्यावत करणे आदी बाबींचा लाभ नागरिकांना मिळणार असल्याचे उपविभागीय अधिकारी श्री. शेवाळे यांनी प्रसिद्धीपत्रकाद्वारे कळविले आहे. 

यासोबतच सातबाराचे वितरण, तलाठी व मंडळ अधिकारी कार्यालयातून फेरफार आणि ८ अ चा उतारा व इतर प्रमाणपत्रे देणे, विविध प्रकारचे शैक्षणिक व इतर योजनांचे प्रमाणपत्र, उत्पन्न, वय, अधिवास, रहिवाशी, जात प्रमाणपत्राचे वाटप करणे, उन्नत व प्रगत गटात मोडत नसल्याचे प्रमाणपत्र, आधार अद्ययावतीकरण संदर्भातील सेवांचा यामध्ये समावेश आहे. 

या सर्व प्रकारच्या सेवा देण्याच्या जिल्हाधिका-यांच्या सूचनेनुसार उपविभागीय अधिकारी दत्तू शेवाळे आणि तहसीलदार गणेश चव्हाण यांच्या नियोजनातून नागरिकांना १५ जूनपर्यंत या सेवा मिळणार असल्याचे त्यांनी सांगितले आहे. त्यामुळे उपविभागातील सर्व नागरिकांनी उपविभागीय अधिकारी कार्यालय परभणी व तहसील कार्यालय परभणी यांच्यासह तलाठी व मंडळ अधिकारी कार्यालय, महा-ई-सेवा केंद्र यांच्याकडे रितसर अर्ज करून जास्तीत-जास्त योजनांचा लाभ घेण्याचे आवाहन उपविभागीय अधिकारी दत्तु शेवाळे केले आहे......