🌟मारिया माँटेसरी पुण्यस्मरण/ स्मृतिदिन विशेष : मारिया माँटेसरी: शिशु शिक्षण पुरस्कर्त्या....!

🌟अभ्यासाने मुलांना शीण न येता त्यांचा मानसिक विकास साधला जातो, असे त्यांचे म्हणणे होते🌟

मारिया माँटेसरी मॅडम शिशुशिक्षणाच्या पुरस्कर्त्या होत्या. त्यासाठी त्यांनी नवीन तंत्र व उद्योग शोधून काढले. मुलांचे खेळ व छंद यांवर त्यांचे मानसशास्त्र अवलंबून होते. अभ्यासाने मुलांना शीण न येता त्यांचा मानसिक विकास साधला जातो, असे त्यांचे म्हणणे होते. त्यांना भारतातील शांततेसाठी व शैक्षणिक कार्यासाठी दोन वेळा नोबेल शांती पुरस्काराचे नामांकन मिळाले आहेत. माँटेसरी यांनी बालकांच्या शिकण्याची प्रक्रिया लक्षात घेत लर्निंग बाय कनेक्टिंग हा सिद्धांत मांडला. त्यात त्यांनी शिकण्याच्या तीन पायऱ्या मांडल्या- १) बालकांकडून नैसर्गिकरित्या मात्र त्यांच्या सक्रीय सहभागातून दिवसभरातील संपूर्ण घटना आत्मसात केले जाते. २) बालकांना नियंत्रित उपक्रम देणे, त्याचे पुन्हा पुन्हा सराव करावे लागते. हेतुपूर्ण सराव आणि आधी इंद्रियांद्वारे आत्मसात केलेल्या माहितीमुळे बालकांना शिकणे दृढ होते. ३) संकल्पना स्पष्ट होण्यासाठी बालकांना उपयुक्त आणि अर्थपूर्ण वाटेल असे काम द्यावे लागते. बालकेही ते अर्थपूर्ण करण्यासाठी खेळ अथवा कृती शोधून काढतात. या पायऱ्यांच्या आधारे बालकांच्या सर्व गरजा पुरविणारे आणि विकासाची साधने त्यांनी आपल्या शिक्षण पद्धतीत निर्माण केल्या. त्यांनी मतिमंदांच्या शिक्षणासाठी बालकांना आकर्षून घेणारी, एकाग्रता वाढविणारी आणि त्यांच्या क्षमतेचा विकास घडविणारी अनेक शैक्षणिक साहित्य, खेळणी तयार केली. त्यांतून बालघराचा शास्त्रीय अभ्यासक्रम आणि आखावी कार्यक्रम तयार केला. या साहित्याच्या उपयोगाने मतिमंदांची प्रगती होत असल्याचे दिसून आले. त्यांपैकी काही मुले तर सर्वसामान्य मुलांची बरोबरी करू शकली. या अनपेक्षित यशाने भारावून जाऊन माँटेसरी यांनी रोम विद्यापीठात तत्त्वज्ञान, मानवशास्त्र व मानसशास्त्र या विषयांचा सात वर्षांचा अभ्यासक्रम पुरा केला. या अभ्यासक्रमाचा उपयोग करण्यासाठी त्यांना योग्य संधी लाभली. मनोविकास साधणाऱ्या शिक्षणाची नवीन पद्धती त्यांनी शोधून काढली. ती माँटेसरी शिक्षण पद्धती- माँटेसरी टिचींग मेथड या नावाने जगभर संबोधली जाते.

     माँटेसरी मारिया या प्रसिद्ध इटालियन शिक्षणतज्ज्ञ, शरीरविज्ञ व माँटेसरी शिक्षणपद्धतीच्या जनक होत. त्यांचा जन्म इटलीतील क्याराव्हाले या गावी दि.३१ ऑगस्ट १८७० रोजी एका मध्यमवर्गीय सुशिक्षित कुटुंबात झाला. त्यांचे वडील राज्य संचालित उद्योगांचे संचालक होते. त्यांची वाढ होत असताना इटलीमध्ये स्त्रीयांच्या सामाजिक भूमिकेबद्दल रूढीवादी मूल्ये बजावली गेली. त्यामुळे त्यांचे कुटुंब गाव सोडून रोमला गेले. स्त्री शिक्षणाला बंदी असताना त्यांनी वयाच्या चौदाव्या वर्षी तेथील मुलांच्या तांत्रिक शिक्षण संस्थेत प्रवेश घेतला. त्या ठिकाणी त्यांनी गणित विषयातील योग्यता आणि विज्ञानात विशेषत: जीवशास्त्रातील हितसंबंध विकसित केले. इटली देशात सार्वजनिक शाळेत जाणारी पहिलीच मुलगी असा त्यांचा नावलौकिक आहे. त्यामुळे घरातील व बाहेरील लोकांच्या टीकेला लहानपणापासूनच त्यांना तोंड द्यावे लागले. सन १८९६मध्ये त्यांनी रोम विद्यापीठाची वैद्यकाची पदवी मिळविली; मात्र त्यांना अभियंता होण्याची इच्छा होती. ही पदवी मिळविणाऱ्या इटलीतील त्या पहिल्याच महिला होत. पदवी मिळविल्यानंतर रोममधील सार्वजनिक रुग्णालयातील वैद्यक- डॉक्टर या जागेसाठी झालेल्या स्पर्धेत त्यांनी भाग घेतला आणि त्यात त्यांना यश मिळाले. यूरोप खंडात अशा मानाच्या जागी निवडलेल्या माँटेसरी पहिल्याच महिला होत. वृत्तपत्रांनी त्यांना सूर्यकिरण- सन रे म्हणून गौरविले होते.

     माँटेसरी मॅम या दोनच वर्षात रोममधील मंदबुद्धी मुलांच्या शाळेच्या प्रमुख झाल्या आणि त्यांच्या मनात शिक्षणकार्याविषयी कुतूहल जागृत झाले. तूरीन येथे भरलेल्या वैद्यकीय परिषदेत भाषण करताना त्यांनी मतिमंद मुलांकडे समाज व वैद्यक यांचे होणारे दुर्लक्ष हे गुन्हेगारीचे खरे कारण होय, असा विचार मांडला. त्यांच्या या स्पष्ट सडेतोड विधानाचा यूरोपभर परिणाम झाला. खुद्द इटलीत मंदबुद्धीच्या मुलांसाठी संस्था स्थापन झाल्या. मानसिक वैफल्य ही वैद्यक शास्त्रातील समस्या नसून ती प्रामुख्याने शैक्षणिक समस्या आहे, असे त्यांना वाटत असे. या दृष्टीने त्यांनी मनोविकलांच्या शिक्षणपद्धतीचा अभ्यास केला. सन १८९९मध्ये रोममधील महिला विश्वविद्यालयात आरोग्यशास्त्राची प्राध्यापिका म्हणून त्यांची नेमणूक झाली. लंडनमधील महिला परिषदेस इटालियन महिलांची प्रतिनिधी म्हणून त्या हजर होत्या. त्या ठिकाणी नॅशनल लीगने सुरू केलेल्या ऑर्थोफर्निक स्कूलमध्ये सह समन्वयक म्हणून त्यांनी काम केले. त्यामध्ये त्यांनी ३ ते ६ वर्षे वयांच्या बालकांच्या शिक्षणसाठी अनेक शैक्षणिक साधने निर्माण केली. नवीन पद्धती तयार करताना त्यांनी जीन इटार्ड व एडवर्ड सेग्विन या त्यांच्यापूर्वीच्या दोन मानसशास्त्रज्ञांच्या विचारांचा आधार घेतला. सन १९०४मध्ये निष्णात वैद्यक म्हणून संपूर्ण रोममध्ये त्यांची प्रसिद्धी झाली. तसेच रोम विद्यापीठात मानवशास्त्राची प्राध्यापिका म्हणून त्यांची नेमणूक झाली. त्यांनी रोममध्ये त्या काळी गृहनिर्माण समितीने बांधलेल्या प्रत्येक घरात शिशुगृहे उघडण्याची कल्पना शोधून काढली. घरात राहणाऱ्या भाडेकरूंच्या २ ते ७ वर्षे वयोगटातील सर्व मुलांना एकत्र करून त्यांची देखरेख शिक्षिकेवर सोपवायची व तिलाही त्याच घरात राहावयास जागा द्यावयाची, अशी ही योजना होती. या समितीने बांधलेल्या घरांचे तेथे राहणाऱ्या मुलांकडून नुकसान होऊ नये, हा या योजनेचा उद्देश होता. त्यातूनच ६ जानेवारी १९०७ रोजी त्यांनी त्या बालकांसाठी रोमच्या गलिच्छ वस्तीत बालघर ही पहिली शाळा सुरू केली. येथूनच एक अभिनव पद्धत सुरू झाली. समितीच्या सर्व घरांत नियोजित केलेल्या शिशुगृहांचे संचालकत्व माँटेसरी यांच्याकडे देण्यात आले व सामान्य बालकांच्या शिक्षणाला नवी दिशा देण्याची संधी त्यांना मिळाली. यानंतर त्यांनी वैद्यकीय व्यवसायातील प्रतिष्ठा व पैसा यांचा मोह टाळून शैक्षणिक कार्यास स्वतःस वाहून घेतले.

       त्यांनी सन १९०९ मध्ये माँटेसरी शिक्षण पद्धतीच्या शिक्षक-प्रशिक्षणाचा पहिला वर्ग उघडला. माँटेसरी यांची शिक्षणविषयक कल्पना वस्तूनिष्ठतेवर उभारलेली होती. तीमध्ये जीवनशक्तीचा आविष्कार हे प्रमुख तत्त्व होते. सन १९१६ मध्ये त्यांनी ६ ते १२ वर्षे वयोगटातील बालकांना उपयुक्त ठरेल अशी गणित, व्याकरण, भूमिती शिकविण्याची सोपी पद्धत तयार करून त्यावर आधारित सेल्फ एज्युकेशन इन एलीमेंटरी स्कूल हा ग्रंथ लिहिला. पहिल्या जागतिक महायुद्धानंतर त्यांनी स्थापन केलेली इटलीतील संस्था बंद पडली. नंतर त्या अमेरिकेत गेल्या. न्यूयॉर्क येथे त्यांनी माँटेसरी शिक्षक-प्रशिक्षण महाविद्यालय स्थापन केले व ते एलिनार पार्कहर्स्ट यांच्याकडे सोपविले. दुसऱ्या महायुद्धापासून त्यांच्या प्रवासास सुरुवात झाली. या प्रवासात त्यांनी शिशुशिक्षण पद्धतीचे बीजारोपण केले. माँटेसरी यांचे दि.६ मे १९५२ रोजी नोर्टवाइक- हॉलंड येथे निधन झाले.

!! जंग ऐ अजित परिवारातर्फे स्मृतिदिनी त्यांना व त्यांच्या शिक्षणप्रणालीस मानाचा सॅल्यूट !!

- संकलक - श्री कृ. गो. निकोडे- कृगोनि, से.नि.शिक्षक.

 (कवी आणि लेखक)

  मु.पो.ता.जि. गडचिरोली. ७४१४९८३३३९.