🌟बहुजन समाजातील विस्थापितांची वंचना आणि फुले-आंबेडकरी विचारांकडे प्रस्थापितांकडून डोळेझाक...!

🌟याविरुद्ध सक्रिय चळवळ उभारण्यास मी आता मुक्त झालो आहे - डॉ.ऋषीकेश कांबळे                                                

✍️ मोहन चौकेकर 

- छ. संभाजीनगर - औरंगाबाद : संभाजीनगर --औरंगाबादमधील समर्थ नगर भागातील औरंगाबाद  गांधीभवन मधील 29 मे रोजी आयोजित सेवानिवृत्ती प्रित्यर्थ आयोजित सन्मान सोहळ्यामधे फुले-शाहू-आंबेडकरी चळवळीचे खंदे समर्थक, क्रांतिकारी विचारवंत, कुशाग्र समिक्षक- लेखक-कवि तथा सर्वंकष साहित्य प्रांतातील एका प्रभावी प्रतिभेचे धनी सत्कार मूर्ती डॉ. ऋषीकेश कांबळे यांनी  आपल्या सत्कार प्रसंगी आपले मनोगत व्यक्त करताना   बहुजन समाजातील विस्थांपिताची वंचना फुले -- आंबेडकर विचारांकडे प्रस्थापितांकडुन होणारी डोळेझाक  याविरुद्ध  सक्रिय चळवळ उभारण्यास मी आता मुक्त झालो  उदगार काढले. तसेच बाबासाहेबांनी उभारलेल्या चळवळीला येत असलेली मरगळ, त्यांच्या नांवावर नोकऱ्या मिळवणाऱ्या बहुतांश पांढरपेशांनी आपल्यापुरत्या छंदीफंदी सुखलोलूप विश्वात रममाण होतांना समाजातील वंचित घटकांकडे फिरवलेली पाठ

व महापुरुषांच्या सामाजिक विचारधारेशी त्यांची होत असलेली बेईमानी अन् केवळ जयंती-पुण्यतिथीनिमित्ताने पूजा-पाठ करण्याची निर्माण केलेली नवीन परंपरा इ. बाबतीत घणाघाती व परखड मत मांडून त्याविरुद्ध कृतिशील वैचारिक मोहीम सुरू करण्याचा मानसही जाहीर केला. यावेळी ज्यांच्या हस्ते हा सत्कार संपन्न झाला त्या सुप्रसिद्ध कादंबरीकार तथा समिक्षक दादा गोरे यांनी सरांची वैचारिक व साहित्यिक प्रगल्भता तर सन्मान सोहळ्यानिमित्त भाष्य करताना ख्यातनाम लेखक-कवी-कादंबरीकार डॉ. सुदाम राठोड यांनी सरांची आक्रमक निर्भिडता व स्पष्टवक्तेपणा याबाबत तसेच प्रमुख पाहुणे म्हणून ज्येष्ठ पत्रकार स. सो. खंडाळकर आणि कार्यक्रमाचे अध्यक्ष चिरपरिचित  समिक्षक तथा सुप्रसिद्ध ग्रामीण कथाकार डॉ. वासुदेव मुलाटे या उभयतांनी कांबळे सरांच्या अष्टपैलू व विवेचक लेखनशैली संदर्भात तर आयोजकांपैकी ज्ञानेश्वरी बहुउद्देशीय संस्थेचे विचारी साहित्यिक डॉ. दैवत सावंत यांनी सरांच्या वाचन-चिंतन-मननातील चिरंतन चिवटपणा इत्यादी सरांच्या व्यक्तीमत्वातील विविध पैलूंवर अत्यंत अभ्यासपूर्ण असे विचार मांडले. या सन्मान समारंभासाठी आयोजकांकडून विशेष निमंत्रित उद्रेक कार डॉ. विजयकुमार कस्तुरे, ॲडव्होकेट, अध्यक्ष, बहुजन साहित्य संघ, चिखली तथा ज्येष्ठ कथाकार--कवी बबनराव महामुने, संघटक, ब. सा. संघ, चिखली, तसेच शासन पुरस्कार प्राप्त मराठी चित्रपट " भोंगा " मधील प्रमुख अभिनेते तथा सहदिग्दर्शक श्रीपाद जोशी, अंतर्राष्ट्रीय ऑनलाईन शास्त्रीय नृत्य परिक्षक मराठी अभिनेत्री रेणू जोशी/महामुने, यांच्या सह  विविध संस्था तथा मान्यवरांच्या हस्ते सत्कार मुर्ती डॉ. ऋषीकेश कांबळे सरांचा हृद्य सत्कार करण्यात आला. या कार्यक्रमाचे आयोजन अत्यंत अल्पवेळात प्रगतीशील लेखक संघ, औरंगाबाद चे डॉ. इकबाल मिन्ने, आशा डांगे, शताब्दी काव्य मंडळाचे सुनील उबाळे, गांधीभवनचे मच्छिंद्र गोर्डे, सुप्रसिद्ध कवी डॉ. हबीब भंडारी, भोगवटाकार सुदाम मगर, सा. झेपचे डी. एन्. जाधव आणि डॉ. दैवत सावंत तथा इतर अनेक दिग्गज साहित्यिक मंडळींनी करून पुरोगामी वैचारिक लेखन विश्वातील शेकडो मान्यवरांच्या साक्षीने हा भावनिक सन्मान सोहळा यशस्वीपणे पार पाडला....

✍️ मोहन चौकेकर