💥मराठवाड्याच्या पाणी प्रश्नांवर ना.पंकजाताई मुंडे यांनी पुन्हा एकदा मांडली आग्रही भूमिका...!

💥जायकवाडीतील नद्यांचे पाणी प्रवाही कालव्याद्वारे सिंधफणा,वाण उपखोऱ्यांना सोडण्याची मुख्यमंत्र्यांकडे केली मागणी💥

💥मराठवाड्याला पाणी देण्यासाठी जलसंपदा मंत्र्यांनी दिले तात्काळ बैठकीचे निर्देश💥

मुंबई (प्रतिनिधी) :-  दि. १७ -मराठवाड्यात सातत्याने निर्माण होणा-या दुष्काळ परिस्थितीवर  मात करण्यासाठी जायकवाडी प्रकल्पात उपलब्ध होणारे पश्चिम वाहिनी नद्यांचे पाणी समांतर प्रवाही कालव्याद्वारे माजलगाव धरणात आणून त्याद्वारे सिंधफणा, कुंडलिका, वाण, मनार व मांजरा उपखोऱ्यात वळविण्यात यावे अशी मागणी राज्याच्या ग्रामविकास आणि महिला बालविकास मंत्री ना पंकजाताई मुंडे यांनी मुख्यमंत्री ना. देवेंद्र फडणवीस यांच्याकडे निवेदनाद्वारे केली आहे. या मागणीनंतर लगेचच जलसंपदा मंत्री गिरीश महाजन यांना तात्काळ बैठक घेण्याचे निर्देश दिले आहेत.

  मराठवाड्यातील धरणे पांच वर्षातून एखाद्या वर्षी भरतात, इतर वेळी धरणे धरणे कोरडी पडल्याने अवर्षणाची स्थिती असते. सिंचनाची खात्रीशीर सोय उपलब्ध नसल्याने हा भाग कायम दुष्काळी असतो. नाशिक जिल्ह्यात पडणा-या पावसाचे अंदाजे दहा हजार ४५४ दलघमी पाणी पश्चिम वाहिनी नद्यांद्वारे समुद्राकडे वाहून जाते तसेच जायकवाडी प्रकल्पाच्या वरील बाजूस ६२३ लहान-मोठी धरणे असल्यामुळे जायकवाडी प्रकल्प देखील प्रत्येक वर्षी पुर्ण क्षमतेने भरत नाही. यासाठी पश्चिम वाहिनी नद्यांचे समुद्राकडे वाहून जाणारे ३ हजार १७८ दलघमी पाणी गोदावरी खो-यात आणणे प्रस्तावित आहे, यापैकी ५७० दलघमी पाणी जायकवाडी धरणस्थळी उपलब्ध करून दिल्यास त्याचा फायदा दुष्काळग्रस्त मराठवाड्याला होईल असे ना. पंकजाताई मुंडे यांनी निवेदनात नमुद केले आहे.

  जायकवाडी धरण ते सिंधफणा नदीला  जोडणारा जलदगती प्रवाही कालवा ७० किमी पर्यंत काढावा, मांजरा, वाण, सरस्वती, गुणवती, बोरणा, मासोळी, व मनार प्रकल्पाचे  स्थैर्यकरण करणेसाठी उपसा सिंचन योजनेद्वारे पाणी उपखोऱ्यात वळविण्यात यावे, जेणेकरून
मराठवाडयातील बीड, केज, धारूर, वडवणी, शिरूर, पाटोदा, माजलगाव, अंबाजोगाई, परळी, अहमदपूर, कंधार, रेणापूर, चाकूर, बिलोली व मुखेड तालुक्यात नवीन सिंचन योजना हाती घेता येतील असे ना. पंकजाताई मुंडे यांनी म्हटले आहे. प्रस्तावित योजनेसाठी अंदाजे ६ हजार ७०० कोटी खर्च अपेक्षित असून,  योजनेचे सर्वेक्षण तात्काळ करावे व त्यासाठी २० कोटी रुपयांचा निधी उपलब्ध करून द्यावा मागणी त्यांनी केली आहे. दरम्यान, ना. पंकजाताई मुंडे यांच्या मागणीची मुख्यमंत्र्यांनी तातडीने दखल घेतली असून जलसंपदा मंत्री गिरीश महाजन यांनी यासंदर्भात बैठक बोलावली आहे...