💥कर्जबुडव्यांनी थकवले १.५० लाख कोटी एक तृतीयांश थकवलेले कर्ज स्टेट बँकेचे...!

💥केंद्रीय अर्थमंत्री निर्मला सीतारामन यांनी दिली माहिती💥

देशातील सरकारी बँकांच्या कर्जबुडव्यांकडील (विलफूल डिफॉल्टर्स) कर्जाची एकूण थकीत रक्कम आर्थिक वर्ष २०१८-१९मध्ये १.५० लाख कोटी रुपयांवर पोहोचली आहे. आश्‍चर्याची बाब म्हणजे एकूण थकीत कर्जापैकी एक तृतीयांश कर्ज स्टेट बँकेच्या कर्जबुडव्यांनी थकवले आहे. केंद्रीय अर्थमंत्र्यांनी ही माहिती नुकतीच संसदेत दिली.

निर्मला सीतारामन यांनी दिलेल्या माहितीनुसार स्टेट बँकेच्या सहेतुक कर्जबुडव्यांनी ४६१.५८ अब्ज रुपये थकवले आहेत. सहेतुक कर्जबुडव्यांनी कर्जे थकविण्यात स्टेट बँकेपाठोपाठ पंजाब नॅशनल बँकेने (पीएनबी) दुसरा क्रमांक पटकावला आहे. ‘पीएनबी’च्या कर्जबुडव्यांनी २५०.९ अब्ज रुपये थकवले आहेत. तर, बँक ऑफ इंडियाच्या कर्जबुडव्यांनी ९८.९ अब्ज रुपये थकवले आहेत.

रिझर्व्ह बँकेच्या एका आकडेवारीनुसार ३१ मार्च २०१९पर्यंत सरकारी बँकांनी दिलेल्या कर्जांची रक्कम ६३८.२ अब्ज रुपयांवर पोहोचली आहे. त्यातच विजय मल्ल्या, नीरव मोदी, मेहुल चोक्सी यांची प्रकरणे उघडकीला आल्यानंतर अशा सहेतुक कर्जबुडव्यांच्या विरोधात केंद्र सरकारने कडक पावले उचलली आहेत. केंद्र सरकारने सहेतुक कर्जबुडवे आणि त्यांच्या कंपन्यांना खुल्या बाजारातून भांडवल गोळा करण्यास आणि आर्थिक दिवाळखोरी प्रतिबंधक प्रक्रियेत सहभागी होण्यास बंदी घातली आहे. गेल्या तीन वर्षांत सरकारी बँकांनी त्यांच्या सहेतुक कर्जबुडव्यांच्या विरोधात पोलिसांमध्ये १ हजार ४७५ तक्रारी दाखल केल्या आहेत....